Монгол гүрэн буряад үйлэдбэрилэгшэдэй продукци гадаада руу эльгээхэ түб болохо арга хараална

Үнгэрһэн долоон хоногто Буряад Уласай Үйлэдбэриин, худалдаа наймаанай ба хүрэнгэжүүлгын сайд Денис Гармаев Монголой Гүрэнэй Ехэ Хуралай индустриализациин политикаар Хубилдаггүй хорооной түрүүлэгшэ Сайнхуугийн Ганбаатарай зүбшэлэгшэ Зоригтбаатар Сухбаттай хөөрэлдөө эмхидхэбэ.

- Монгол гүрэнтэй манай холбоо улам бэхижэнэ. Энэ жэлдэ Монгол гүрэнэй  делегаци Буряад орон ерэжэ, Илалтын 80 жэлэй ойн баярта хабаадаа. Хэдэн үдэрэй туршада манай гүрэнүүдэй харилсаан тухай олон үгэнүүд хэлэгдээ. Энэ манай хамтын Агууехэ Илалта. Һаяын сагта Буряад Уласта ба Монгол гүрэндэ экспорт ба импортын, аяншалгын, тамуужанай асуудалнуудаар хамтын ажалай бүлгэмүүд байгуулагдаха, - гэжэ Буряад Уласай Үйлэдбэриин, худалдаа наймаанай ба хүрэнгэжүүлгын сайд Денис Гармаев хэлэбэ.

Зоригтбаатар Сухбат хамтын хэлсээтэй ажалай талаар байгуулагдаха бүлгэмүүдэй хэрэгтэйшье, шухалашье байһые тэмдэглээ.

- Монгол гүрэн хадаа Буряадай үйлэдбэрилэгшэдэй продукци гадаада руу гаргаха талмай болохо аргатай. Буряадай компанинуудай тобьёг мүнөө хүлеэжэ байнабди, - гэжэ Монголой Гүрэнэй Ехэ Хуралай хорооной түрүүлэгшын зүбшэлэгшэ Зоригтбаатар Сухбат хэлэбэ.

Тэмдэглэхэдэ, мүнөө Монгол гүрэн руу эльгээгдэһэн эд бараан, эдеэ хоол ехэ эрилтэтэй. Печени, вафли, шоколад, шэхэр, зүгын бал, БАД-ууд, ногооной сай, таряан, модон ажаһуугшадтань илангаяа һайшаагдана. Монголһоо мяхан, кашемир, нооһоор бүтээгдэһэн хубсаһан, арһаар хэгдэһэн бүтээлнүүд, сүүмхэнүүд ерэнэ. Буряад Уласай ба Монголой олзын хэрэг эрхилэгшэд далда байһан холбоо нүхэдые олохо зорилготойгоор саг үргэлжэ элдэб хэмжээ ябуулгануудта хабаададаг.