Буряад Уласай Үндэһэтэнэй музейн ба «Байгал» театрай барилга ВЭБ.РФ мүнгэн зөөрёор хангаха

ВЭБ.РФ Буряад Уласай Үндэһэтэнэй музейн ба «Байгал» театрай байшангуудые бариха талаар «Инфратех Концессии» холдингын компанинуудта урьһаламжын мүнгэ һомолхо. Концессионно хэлсээн 2023 оной намар Буряад Уласай Соёлой яамантай баталагдаһан байна.

Улаан-Үдэ хотын мастер-түсэбэй шухала түсэлнүүд уридшалан хүгжөөлгын дэбисхэрнүүдэй хэмжээндэ бэелүүлэгдэнэ. Алас Дурнын тойрог ниигэмэй ба экономикын талаар хүгжөөхэ асуудалнуудаар Засагай газарай комиссиин президиум эдэ түсэлнүүдые урид эхилэлгын түсэлнүүд гэжэ зүбшөөгөө.

- Россиин ВЭБ.РФ эмхитэй хамта ниигэмэй объектнүүдые байгуулха дүй дүршэлтэйбди. Мүнөө банк энэ шухала ажал бүтээлгэдэ бидэниие дэмжэнэ. «Байгал» театр буряад соёлой хүгжэлтэдэ сэгнэшэгүй үүргэ дүүргэнэ. Тиимэһээ театрай ерээдүйн байшан тоглолтын талмай байхаһаа гадна соёлой ехэ түб болохо ёһотой, - гэжэ Буряадай Толгойлогшо Алексей Цыденов тэмдэглээ.

Үндэһэтэнэй музей Буряад ороной соёлой уг залгамжын баялиг хадагалха зорилготойгоор байгуулагдана. Музейн коллекци үргэн ниитэ хараха аргатай болохо. Мүнөө сагай эрилтэдэ таарама, уужам танхимуудтай оршон байгуулагдаха, соёлой 73 ажаябуулагша эндэ хүдэлмэритэй болохо, 3,5 мянган экспонат нэгэ газарта табигдаха, экспозицинууд шэнэлэгдэхэ. Комплекс 15,9 мянган хоёролжон метр талмай эзэлхэ. Музейн барилгада дүн хамта 3,69 млрд түхэриг гаргашалагдаха, тэрэнэй 1,9 млрд түхэригынь  ВЭБ.РФ һомолхо түсэбтэй.

Үндэһэтэнэй музейдэ хранилищи, фотолаборатори, шэнэдхэн һэргээлгын мастерскойнууд, үзэсхэлэн дэлгээхэ уужам газар, галерей, зунай террасатай үхибүүдэй түб хараалагдана.

«Байгал» театрай шэнэ байшан 20,3 мянган хоёролжон метр талмайтай байха. Театрай коллектив мүнөө өөрын байшангүй. Түсэл бэелүүлгын дүнгөөр жэлэй туршада 250 хүрэтэр тоглолтонууд табигдаха, харагшадай тоо 4 дахин дээшэлхэ. Соёлой түбэй барилгада 4,56 млрд түхэриг хэрэгтэй. ВЭБ.РФ 2,8 млрд түхэриг шэглүүлхэ аргатай.

«Байгал» театрай шэнэ байшанай ашаглалда тушаагдахада, хатарай, хүгжэмэй, урлалай  һургуулинууд, үхибүүдэй, залуушуулай, наһатайшуулай  клубууд нээгдэхэ. Гадна эндэ олониитын хабаадалгатай хэмжээ ябуулганууд үнгэргэгдэдэг болохо.

Александр Сытько, ВЭБ.РФ-н олзын хэрэгэй талаар гүйсэдхэхы захирал: 

- Эдэ түсэлнүүд үндэһэтэнэй соёл ойлгуулан дэлгэрүүлхэ, уран һайханай үүсхэлнүүдые дэмжэхэ шэглэлээр манай банкын түрүүшын түсэлнүүд. Экономикын ба ниигэмэй һалбаринуудые хүгжөөлгэ ВЭБ.РФ-н шухала шэглэлнүүдэй нэгэн болоно. Улаан-Үдын музейн ба театрай барилгын түсэлнүүд хотын ба нютаг можын экономикодо, соёлдо горитой хубита оруулха.

Буряад Уласта ВЭБ.РФ-н, «Хэб—Хаб» түбэй ба ажаһуугшадай хабаадалгатай «САЙНУУ! ГЭР (ДОМ)» түсэл бэелүүлэгдэнэ.  «САЙНУУ! ГЭР (ДОМ)» «Инфратех Концесси» компаниин хүрэнгэжүүлгын түсэлнүүдэй шугамаар ябуулагдана. Оросой Холбоото Уласай Засагай газар, Буряад Уласай Засагай газар, Соёлой яаман тэдэниие дэмжэнэ.