Эгээ суутай аяншалгын шэглэлнүүдэй тоодо Буряад орон оруулагдаба

Россиин Эдэй засагай яаманай сэгнэлтээр, Буряад Улас эгээ суутай аяншалгын шэглэлнүүдэй тоодо ороно. Зунай сагта уласай дэбисхэр дээрэхи зошод буудалнуудые аяншалагшад олоор эзэлнэ. Энээн тухай Россиин Эдэй засагай сайд Максим Решетников Дмитрий Чернышенкын ударидалга доро үнгэргэгдэһэн аяншалга хүгжөөлгын Засагай газарай комиссиин зүблөөнэй үедэ мэдээсэбэ.

“Буряад Уласай, Крымэй, Алтайн хизаарай, Нижегородско можын, Дагестанай, Башкириин зошод буудалнуудта аяншалагшад олоороо тогтодог болонхой. Эдэ бүгэдые хараадаа абажа, зунай сагта авиакомпанинуудай ажал, агаарай онгосын ниидэхэ гурим шэглэн заһаха, эрилтэ ехэтэй газарнууд руу агаарай онгосонуудые олоор табиха хэрэгтэй. Тиихэдэ түмэр харгын составуудые арга боломжоороо нэмэхэ хэрэгтэй. Энээн тухай хандалга Оросой Холбоото Уласай Унаа тээбэриин яаман руу эльгээгээбди, - гэжэ Россиин Эдэй засагай сайд Максим Решетников мэдээсэбэ.

Буряад Уласай Толгойлогшо Алексей Цыденов аяншалгын һалбари дэмжэхэ хэрэг аша үрэтэй, аяншалагшадай тоо дээшэлээ гэжэ тэмдэглээ.

“Оросой Холбоото Уласай Засагай газарай, Россиин Эдэй засагай яаманай дэмжэлгээр аша үрэтэй программа бэелүүлэгдэжэ, Буряад орондо шэнэ 54 отель бии болоо. “Табан далай ба Байгал” түсэлэй түлөө мүн баяр хүргэнэб. Танай зууршалгаар Россиин Юрэнхылэгшэ Владимир Путин энэ түсэл баталаа. Мүнөө жэлдэ түрүүшын аяншалагшадые угтан абахабди. Тиихэдэ хангамжын ажахын түрүүшын объектнүүдые, зайн галай һужаануудые нээхэ ажал ябуулнабди, - гэжэ Алексей Цыденов хөөрэбэ.

 Ерэхэ зунай һарануудта Буряад Улас руу аяншалагшадай тоо 10 хубяар, 700000 хүрэтэр дээшэлхэ гэжэ хараалагдана. Эндэ унаа тээбэриин шухала удха шанартай  байхые Алексей Цыденов тэмдэглээ.

“Унаа тээбэриин үүргэ ехэ. Алас Дурнын тойрог руу ниидэн ошохо Россиин Унаа тээбэриин яаманай тэдхэмжын программа аргагүй ехэ туһа үзүүлнэ. Энэ хаһаһаа эхилжэ, "Аэрофлот" тус программа Улаан-Үдэдэ бэелүүлхэ, тиихэдэ июнь – сентябрь һарануудта рейснүүдэй тоо олон болгожо, сүүдхын хоёр дахин агаарай онгосонууд ниидэхээр хараалагдана. Зундаа Москва - Улаан-Үдэ - Улаан-Баатар – Бээжэн гэжэ уласхоорондын түмэр харгын маршрудай дахяад нээгдэхые хүлеэнэбди,” - гэжэ Буряад Уласай Толгойлогшо мэдээсэбэ.

Заншалта ёһоор зунай сагта эмхидхэгдэһэн хэмжээ ябуулганууд аяншалагшадай һонирхол татадаг. Май һараһаа сентябрь болотор соёлой, тамирай 15 хэмжээ ябуулга хараалагдана, тэрэ тоодо «Наадан. Сурхарбаан», «Боргойн хониной мяхан» гэжэ эдеэнэй зүйлнүүдэй этнофестиваль, «Ёохорой һүни», уласхоорондын «Нүүдэлшэдэй дуун» гэжэ хүгжэмэй фестиваль, уласхоорондын «Торгон зам» раллиин нютаг можын шата, «Балет Байгал дээрэ. Буряад орон» гэхэ мэтэ.