Буряад Улас аяншалгын һалбариин ажаябуулгаар Алас Дурнын тойрогой түрүүшүүлэй тоодо ороно

«Аяншалга ба хүндэмүүшэ аягай индустри» гэжэ үндэһэтэнэй түсэл бэелүүлгын дүнгүүд, һаяын жэлнүүдэй түсэбүүд тухай Буряад Уласай Аяншалгын сайд Алдар Доржиев мартын 26-да үнгэргэгдэһэн  пресс-клубай үедэ хөөрэбэ.

Мүнөөдэрэй байдалаар уласта аяншалгын 35 оператор, 105 агентство, 80 гид–экскурсовод хүдэлнэ, аяншалагшадта һуури олгохо 500 арга бии. Һалбарида 3000 гаран хүн хүдэлнэ.

- 2023 онтой сасуулбал, 2024 ондо Буряад орон руу 7,8 хубяар олон аяншалашад ерээ, тодорхойлбол, 600000 гаран хүн. Буряадай экономикодо аяншалгын һалбариһаа 16 миллиард түхэриг ороо, - гэжэ Алдар Доржиев хөөрэбэ.

2022 - 2024 онуудта Буряад Уласта 1,4 млрд түхэригэй гүрэнэй дэмжэлгэ үзүүлэгдээ. Тиихэдэ хүрэнгэ шэглүүлэгшэдэй 1 млрд түхэриг татагдаа, тэрэ тоодо аяншалгын һалбарида хүдэлдэг ондоо нютаг можонуудай олзын хэрэг эрхилэгшэдһээ.

Буряад орон «Табан далай ба Байгал» гэжэ федеральна түсэлдэ хабаадана. Буряадай ба Эрхүү можын дэбисхэрнүүд дээрэ жэлэй дүрбэн сагта хүдэлдэг «Шэдитэ Байгал» гэжэ курорт байгуулагдаха. Буряад Уласта хүрэнгэ шэглүүлэлгын 8 түсэл федеральна хэмжээнэй түсэлдэ ороо, тиихэдэ бюджедһээ гадуур нэмэлтэ 99 млрд түхэриг элсүүлхээр түсэблэгдэнэ. Хүрэнгэ шэглүүлэгшэд 4,6 мянган һууритай аяншалгын инфраструктура, ажалай 2,5 мянган һуури байгуулха.

2025 – 2027 онуудта холбоото уласай түсэлөөр «Турка», «Пески» ба «Горячинск» гэжэ участогуудта 1644,02 сая түхэригэй хангамжын ажахынууд байгуулагдаха.

- Ерэхэ жэлдэ, 2026 оной 1-дэхи кварталда, «Грин флоу Байкал» гэжэ отель аяншалагшадые угтан абаха. 153 номертой зошод буудал 4 мүшэтэй байха. Холбоото уласай түсэлэй хэмжээндэ зайн галаар хангалгын объектнүүдэй барилгада 215 сая түхэриг һомологдохо. 2030 он болотор  20 миллиард мүнгэн зөөри хангамжын ажахы байгуулгада элсүүлхэ түсэб табинабди. Гэхэтэй хамта, 10 миллиардһаа бага бэшэ хүрэнгэжүүлгэ татахаар түсэблэнэбди, - гэжэ  Алдар Доржиев хөөрэбэ.

«Аяншалга ба хүндэмүүшэ аягай индустри» гэжэ үндэһэтэнэй түсэлэй ашаар 2022 – 2024 онуудта дүн хамта 588 номертой модульна объектнүүдые байгуулха 54 түсэл Улаан-Үдэдэ ба уласай 10 аймагуудта бэелүүлэгдээ. 2023 ондо долоон пляж болбосон түхэлтэй болгогдоо, жэлэй дүрбэн сагта хүдэлдэг 10 бассейн бии болоо. Юһэн зошод буудалда хизаарлагдамал арга боломжотой зондо тааруу зохид оршон зохёогдоо. Үндэһэтэнэй түсэлэй хэмжээндэ 35 олзын хэрэг эрхилэгшэ түхеэрэлгэнүүдые ба хэрэгтэй тоног худалдажа абаха дэмжэлгэдэ хүртөө.

2025 онһоо 2030 он болотор «Аяншалга ба хүндэмүүшэ аяг» гэжэ үндэһэтэнэй шэнэ түсэл аяншалгын һалбари дэмжэхэ. Буряад Уласай Аяншалгын яаман хабсарагдадаг зошод буудалнуудые 2025 – 2027 онуудай туршада бариха захяа бэлджэ байна. Түрүүшын 17 түсэл Россиин Экономикын талаар хүгжэлтын яаман руу эльгээгдээ. Мүнөө үшөө 44 мэдүүлгын шалгалта дүүрэхэ дүтэлөө.