Буряад Уласай Толгойлогшо нютаг можын үйлэдбэриин  түрүүшын талмай ошожо хараба

Улаан-Үдэдэ «Энерготехномаш» гэжэ акционернэ бүлгэмэй бааза дээрэ нютаг можын үйлэдбэриин түрүүшын талмай нээгдэбэ. Зайн галаар, дулаагаар, уһаар хангагдаһан талмай 6,3 мянган хоёролжон метр газар эзэлнэ. Апрелиин 4-дэ Буряад Уласай Толгойлогшо нютаг можын үйлэдбэриин  талмай ошожо хараба. Үйлэдбэриин һалбарида хүдэлжэ байһан олзын хэрэг эрхилэгшэдые урмашуулхын тула тэдэнэй гаршануудай зарим хуби мүнгэн тэдхэмжэтэй байхаар хараалагдана.  

Буряад Уласай Толгойлогшо талмайн нээлгэдэ хабаадажа, «Энерготехномаш» гэһэн акционернэ бүлгэмэй арга шадал, олзын хэрэг эрхилэгшэдэй ажаябуулга сэгнэбэ.

- «Энерготехномаш» шэнэ дэлгүүрнүүдые шудалан ашаглана. Эндэ бүтээгдэдэг  ЖКХ-гай, дулаа үгэдэг системын продукциин 95 хуби бүхы Росси гүрэн дотор наймаалагдана. Атомна электростанцинуудташье хэрэгтэй болодог продукци эндэ гаргажа худалдадаг. Санкцинууд дэмжэлтэ үзүүлээ, үрдилдэгшэд гаража ошоо, тиимэһээ манай үйлэдбэридэ ехэ дэлгүүр нээгдээ. Хитад гүрэнэй продукци байгаашье һаань, манай үйлэдбэри өөрын дэлгүүртэй, хүгжэлтын хараа бодолнуудтай, үйлэдбэриин хэмжээ дээшэлүүлхэ аргатай. Бидэ туһа үзүүлхэбди. Мүнөө бюджедэй дэмжэлгээр шэнэ станогууд абтаа. Энээнһээ уламжалан продукциин шанар, үйлэдбэриин хэмжээн дээшэлээ. Маркетингын, үйлэдбэри урагшань түлхихэ хэрэгтэ дэмжэлгэ үшөө хэрэгтэй, бидэ туһалхабди, - гэжэ Буряадай Толгойлогшо тэмдэглээ.

«Энерготехномаш» бүлгэмэй талмайнуудта найман резидент хүдэлнэ. Эд бараан, хабсарагдадаг гэрнүүд, хүтэлэгшэгүйгөөр ниидэдэг аппарадууд, түмэрөөр бүтээгдэһэн хэрэгсэлнүүд, туалетнэ саарһан, вентиляци гэхэ мэтэ эндэ үйлэдбэрилэгдэнэ.

- Талмай аша үрэтэйгөөр хэрэглэгдэнэ. Бюджедһөө аренднэ түлбэриин зарим хуби тэхэрюулнэбди. Дэмжэлгэ үргэлжэлүүлхэбди, гэр бүлэеэ тэдхэхэ, олзо олохо талаар тааруу эрхэ нүхэсэл байгуулхабди, - гэжэ Алексей Цыденов хэлэбэ.
Байшан дотор 1100 хоёролжон метрэй сүлөө талмай үлөө. Саашадаа үшөө нэмэлтэ 600 хоёролжон метрэй талмай бэлдэхээр гэжэ «Энерготехномаш» бүлгэм хүтэлэгшын орлогшо Архипов Руслан тэмдэглэбэ. Үйлэдбэриин талмай дээрэ болбосоруулгын үйлэдбэринүүд хүдэлхэ аргатай. Эдеэ хоолой үйлэдбэри эрилтэнүүдтэ тааранагүй.