Буряад Уласта «Ургалтын платформа» программын хэмжээндэ үзэсхэлэн дэлгээгдээ

Апрелиин 11-дэ Улаан-Үдэдэ Wildberries & Russ (РВБ) гэжэ нэгэдэмэл  компаниин, Стратегическа үүсхэлнүүдэй Агентствын (АСИ) эхилһэн «Ургалтын платформа» программын хэмжээндэ нютаг можын үйлэдбэрилэгшэдэй үзэсхэлэн дэлгээгдээ, Буряад Уласай олзын хэрэг эрхилэгшэд маркетплейсын түлөөлэгшэдтэй уулзаа.

Олзын хэрэг эрхилэгшэд маркетплейс дээрэ продукцияа эдэбхитэй наймаалдаг. Зарим эд бараагаа Россиин нютаг можонуудта, СНГ- гүрэнүүдтэ амалтатай худалдадаг.

- Үнгэрэгшэ жэлэй туршада Вайлдберризай платформа дээрэ манай уласай олзын хэрэг эрхилэгшэд наймаагайнгаа хэмжээ 50 хубяар дээшэлүүлээ, үшөөшье һайнаар хүдэлхэ арга шадалтай. «Ургалтын платформа» программада оролсожо, үшөө ехэ зорилгонуудые табиха хэрэгтэй. Худалдаанай хэмжээ дээшэүүлхэ, реклама ябуулха аргануудтай тус программа танилсуулна. Мүнөөдэр маркетплейс дээрэ 23 олзын хэрэг эрхилэгшын 30 бренд бии. Энэ тоо улам дээшэлхэ, этигэнэб, - гэжэ Буряад Уласай Үйлэдбэриин, худалдаа наймаанай ба хүрэнгэжүүлгын сайдай уялга саг зуура дүүргэгшэ Алексей Унгаев тэмдэглэбэ.

Түсэл бэелүүлгын хэмжээ ябуулгада хабаадаһан олзын хэрэг эрхилэгшэдэй хэлэһээр, тус программа тэдэнэй ажаябуулга дэмжэхэ үшөө нэгэ зэбсэг болоно.

– Энэ программа хоёр талада ехэ аша үрэтэй. Бидэ продукциингаа янзануудые үргэдхэнэбди, Россиин ба СНГ-н гүрэнүүдэй дэлгүүртэ гараха арга боломжодо хүртэнэбди. Вайлдберриз шэнги талмайнууд байгуулагдахадаа ехэ һайн гэжэ тоолоноб. Юундэб гэхэдэ, олзын хэрэг эрхилэгшэдэй гарша хэдэн дахин бага болоно. Манай эд бараан Россиин нютаг можонууд руу, Казахстан ба Белорусси гүрэнүүд руу эльгээгдэдэг, - гэжэ «Подошва» компаниин захирал Бэликто Халхаров хэлэбэ.

«Ургалтын платформа» түсэлэй хүтэлбэрилэгшын тэмдэглэһээр, реклама, бүхы шатануудта Вайлдберризай мэргэжэлтэнэй хүтэлэлгэ түсэл дэмжэлгын зэбсэг болоно.

– Дэмжэлгын программа 1 жэлэй туршада ябуулагдахаар хараалагдана. Энэ сагай хугасаа соо бренд хүгжэхэ, олондо мэдээжэ болохо ёһотой. Һуралсал түрүүшын 3 һарын туршада эмхидхэгдэхэ. Түсэлдэ оролсохо дуратай хүн Буряад Уласта үйлэдбэритэйб гэжэ баталха болоно, - гээд. Юлия Полетаева онсолбо