Өөрын хэрэг эхилхэ арга

Түнхэнэй аймагай байгаали үзэсхэлэнтэ һайхан гэжэ булта мэдэнэбди. Арюун агаар, хада ууланууд олон зониие гайхуулдаг. Таһархай нютаг­та ерэбэл, эдэ бүгэдые өөрын нюдөөр харахат. Эндэ аян­шалагшадые гайхуулха гэжэ оролдоно. Таһархай нютаг дэ­эрээ Виктория Балданова «Аяншалагшадта тааруу этно-ню­таг» гэһэн проект зохёожо, гүрэнэй талаһаа социальна хэлсээ баталаад, бага ехэ гэнгүй, мүнгэндэ хүртөө.

Морин дээрэ мордожо ябаха хэрэг олон зоной һонирхол татана. Мүнөө сагта түмэр морёор ябажа һуранхайнууд, ябагаар ябахамнай хомор болонхой. Эндэ ерэбэл, мориндо мордожо, элинсэг хулинсагуудайнгаа байдал тухай ойлгожо эхилхэт. Юрий Прушенов моридоор зониие иишэ тиишэнь ябуулдаг юм. Тэрэнэй хэлэһээр, табан маршрут зохёогдонхой. Сагаараа нэгэ часһаа хоёр час болотор ябажа боломоор. Зондо ехэ һайшаагдадаг. Наһан соогоо мориндо мордожо үзөөгүй зон ерээд, бүри ехээр баярладаг.

Айлшадаа морин дээрэ ябуулжа, номо годлёор харбуулжа зугаалуулһанай һүүлээр Виктория Будожаповна һэеы гэртээ урина. Аяга сай эдеэнэй дээжэ гээд хэлэгдэдэгээр, эзэн эхэнэр айлшадтаа халуун зутараан сай шанажа уулгана, һүүлээрнь талхаяа элдэжэ, бууза мушхан, халуун эдеэгээр хүндэлнэ.

Виктория Балдановагай хэлэһээр, иимэ аргаар ёһо заншалаа, буряад хэлэеэ мартуулхагүй зорилго урдамнай табигдана.

Үнинэй иимэрхүү ажал эхилхэ түсэбтэй байгаабди, теэд мүнгэнэй дутаха асуудал гарагша һэн. Теэд нёдондо «Социальна хэлсээн» гэһэн программада оролсожо, 250 мянган түхэриг абааб, тэрэмни яһала хүрөө, - гээд, олзын хэрэг эрхилэгшэ хэлэнэ.

Жэл бүри Түнхэнэй аймагта социальна хэлсээ 50 гаран зон баталдаг байна. Тиимэ хэлсээ баталжа, гүрэнэй туһаламжада хүртэхэ гэбэл, «Госуслуги» соо оро­жо, мэдүүлгэ үгэхэдэ болоно. Тэндэ алхам бүхэниинь дэлгэрэнгыгээр бэшээтэй.