504
Коронавирус үбшэн үдэр бүри ехээр hүжэрhөөр. Ородой Холбоото Уласай Юрэнхылэгшэ Владимир Путин Засагай газарай гэшүүдэй хабаадалгатай зүблөөн дээрэ COVID-19 үбшэнтэй тэмсэлгын талаар нэмэлтэ мүнгэ hомолжо, можо нютагуудта түргэн эльгээхэ гэжэ даалгаа.
Владимир Путин гүрэнэй можо нютагуудта 10 миллиард hомолхо тухай даалгаhан байна. Энэ мүнгэн элүүрые хамгаалгын hалбариин ажалые эршэдүүлхэ хэрэгтэ шэглүүлэгдэхэ. Мүн тиихэдэ гэртээ арга абажа байhан үбшэнтэндэ миинтээр эм дом үгэхэ тухай захирhан байна. Резервнэ жасаhаа энэ зорилгодо мүнгэн hомологдохо юм.
"Россиин Засагай газарhаа эмүүдые абалгада мүнгэнэй ерэхэдэ, амбулаторно арга абажа байhан зондо миинтээр эмүүд үгтэхэ. 37 сая түхэриг Буряадта hомологдоо. 10 үдэрэй туршада энэ мүнгэн ерэхэ. Мүнөөдэрэй талаар Буряадай элүурые хамгаалгын яаман эмүүдые худалдан абаха талаар ажал ябуулна", - гэжэ Элүүрые хамгаалгын яаманай таhагые даагша Елена Доржиева хэлэнэ.
Эмнэлгын эмхинүүд хэр зэргэ эмүүдээр хангагданхайб гэжэ Ород гүрэнэй Засагай газар шалгана. Ямар эмүүд дуталданаб, препарадуудые гаргадаг үйлэдбэрилэгшэдтэй сэхэ хөөрэлдэжэ, үйлэдбэриин яаман захилнуудые хэжэ байнхай. Хэлэлтэйнь гэхэдэ, Буряадай эмэй сангуудта тон хэрэгтэй эм дом дуталдана. Арад зон ехэ хүлгөөтэ болонхой. Энэ байдал гүрэн онсо харалга дороо абаха бэзэ гээд найдагдана.
м
Автор: Эрдэни РАДНАЕВ
Фото: pixabay.com
