​Буряад Уласта хүдөөгөөрхиндэ гүрэнэй туhаламжа хэрэгтэй

Буряадай хүдөө ажахын болон эдеэ хоолой яаманай мэдээсэһээр, 2020 оной туршада федеральна бюджетһээ 48 шахуу сая түхэриг дамжуулагдажа, олон түсэбүүд бэелүүлэгдээ. Энэ мүнгэн гурбан шэглэлээр хубаагдаһан байна: диилэнхи хубинь «Агростартап» гэһэн грантаар таарагдаа, мүн лэ СПоК-нуудта болон фермернүүдтэ тэдхэмжэ үзүүлгын түбтэ нэгэ хэды хэмжээнэй мүнгэн дамжуулагдаа.

Байгша ондо «Агростартап» харалганда 8 фермер амжалта туйлаба. Тэдэнэй зургааниинь хүдөө ажахын 4 кооперативуудай бүридэлдэ ородог байна. Зэдын аймагай «Хамтаа», Яруунын аймагай «Сумья», Захааминай аймагай «Закамна-Агропродукт», Ивалгын аймагай «Саран» гэhэн хүдөө ажахын хамтаралнуудта мүнгэнэй тэдхэмжэ үзүүлэгдээ. Грантын мүнгэндэ хүдөө ажахын 33 техникэ, тракторта холбохо бусад түхеэрэлгэ, эбэртэ бодо мал, газар худалдажа абтаа. Жэшээнь, «Сумья» СПоК-то таряа хуряалгын шэнэ комбайн болон һү үйлэдбэрилгын цех бариха талаар хэрэгтэй зүйлнүүд абтаһан байна гэжэ Буряад Уласай мэдээсэлэй албанда тодорхойлоо.

Хүдөө ажахын яаманда дуулгаhаар гүрэнэй тэдхэмжэ үргэлжэлхэ, жэлhээ жэлдэ фермер болохоёо hанаhан уладууд олон боложол байна. Имагтал залуушуул нютагаа бусажа, эжы абынгаа буусануудта адуу малаа тэжээжэ эхилнэ.