​2021 ондо Буряад Уласай багшанарай салингай гаргаша 4,8 млрд түхэриг хүрэтэр дээшэлүүлэгдэхэ

Буряад Уласай Болбосоролой болон эрдэм ухаанай яаманай мэдээгээр, 2020 ондо багшанарай салинай жасын юрэнхы хэмжээн 4,4 млрд гаран болодог. Ерэхэ жэлдэ 4,8 млрд түхэриг хүрэтэр энэ хэмжээн ехэ болохо. Захиргаанай-ударидаха ажалшадай, номой сангай ажалшадай, психологуудай болон юрэнхы болбосоролой эмхи зургаануудай бусад ажалшадай гаргашада энэ мүнгэн гарахагүй.

Уласай бюджетһээ салингай жаса дээшэлүүлгэдэ нэмэлтэ 403 сая түхэриг һомологдохо болоо гэжэ һануулая.

Юрэнхы болбосоролой муниципальна эмхинүүдтэ юрэнхы болбосорол абалгада мүнгэн сангай хангалгын шэнэ норматив бэлдэгдээ. Урид тэрэ һуурин газарнуудай хүн зоной тооһоо дулдыдан бүридхэгдэдэг байгаа юм. Харин мүнөө 2021 оной январиин 1-һээ багшанарай ажалай салин һургуулида һурагшадай тоогоор бүридхэгдэхэ. 170 юрэнхы болбосоролой эмхинүүдэй 4 мянган багшанарай салин нэмэхэ болоно. Зарим һургуулинуудта ургалта нэгэ хэдыһээ 30% хүрэтэр дээшэлхэ юм.

- Абтаһан нормативууд Ородой Холбоото Уласай Гэгээрэлэй яаманай методическа дурадхалнуудай ёһоор бэлдэгдээ. Манай зорилго ямар байгааб гэхэдэ, багшанарай салинай нормативай һэлгэхэдэ нэгэшье һургуулида доошоолхо ёһогүй байгаа. Багшанарта салинай һэлгэхэ талаар тодорхой мэдээнүүд тарификаци хэгдэһэнэй удаа, 2021 оной январь соо тон эли болохо, - гэжэ Буряад Уласай болбосоролой болон эрдэм ухаанай сайдай нэгэдэхи орлогшо Галина Фомицкая хэлээ.   
Багшанарай ажалай салинай жасада нэмэлтэ болон 277 сая түхэриг федеральна бюджедһөө энэ жэлэй сентябрь соо классай хүтэлбэриин түлөө багшанарай түлбэридэ ерээ һэн. Буряад Уласта классай хүтэлбэриин түлөө түлбэри 6-һаа 11 мянга хүрэтэр болодог.

Ерэхэ жэл энэ шэглэлдэ мүнгэ һомололго 832 сая хүрэтэр дээшэлхэ. Тиигэжэ багшанарта түлбэринүүдэй юрэнхы хэмжээн 5,6 млрд түхэригтэ хүрэхэ.