527
“Хүдөө нютагуудые хүгжөөлгэ” гэhэн программаар Буряадта соёлой байшангууд заhабарилагдана, гудамжануудта зайн гал оруулагдана, хүүгэдэй болон тамирай талмайнууд баригдана. Проектнүүдые бэелүүлгэдэ 400 гаран сая түхэриг hомологдонхой.
Кабанскын болон Түнхэнэй аймагуудта энэ талаар яhала ехэ ажал хэгдэнэ.
Кабанскын аймагта квартал дотор харгы барилга хэгдэнэ. "Хүдөө нютагуудые хүгжөөлгэ" гэhэн программаар 150 сая түхэриг энэ ажалда hомологдонхой.
"Хүдөө ажахын яаманай талаар ехэ ажал хэгдэнэ. Тиигэжэ хүдөө ажахын hалбарида хүдэлдэг мэргэжэлтэдтэ, багшанарта болон эмшэдтэ туhатай ехэ ажал ябуулагдаhаар", - гэжэ Кабанскын аймагай захиргааанай толгойлогшо Алексей Сокольников хэлэнэ.
Береговая гэhэн hууринда хүүгэдэй талмай хэгдээ. Хүдөө нютагуудые хүгжөөхэ программаар хүүгэдэй наадаха гурбан түсэл бэелүүлэгдэхэ байна.
“Бидэ грант бэшэжэ эндэ тэндэ хабааданабди. Программада оролсожо, хамгаалнабди”, - гэжэ "Кабанское" hомоной гулваа Любовь Николаева хэлэнэ.
Хандала нютагай клуб заhабарилагдана. Эндэ шалаа хэгдээ, ханануудынь сэхэлэгдэнэ, шэнэ пол хэгдэхэ. Дулаасуулгын түхеэрэлгэнь hэлгэгдэхэ байна.
Түнхэнэй аймагай Хужар нютагта соёлой байшанда капитальна заhабарилга хэгдэжэ, мүнөө ажал түгэсэхэ тээшээ болоо. Һуурииень шэнэлээ, заhабарилгын ажал үргэлжэлhөөр. Томо багагүй иишээ ерэжэ, сүлөө сагаа үнгэргэдэг байна. Ондоо тээгүүр ябаха өөрын автобустай болоо. Хужир нютагта үйлсэ гудамжануудта зайн гал оруулагдана. Дүн хамта 26 сая түхэригтэ ажал хэгдэжэ байнхай. Хүдөө нютагуудые хүгжөөлгын программаар улас дотор 411 сая түхэригтэ ажал хэгдэжэ байна гээд тэмдэгдэлтэй.
Аршаан дээрэ мүн лэ уhа дамжуулха соргонууд хэгдэнэ. Уhанай соргонууд татагдажа, ажал дүүрэхэ тээшээ болоо. Сэбэр уhатай байхаhаа, сэнтэй юумэн үгы гээд ажаhуугшад хэлэнэ.
2025 он болотор хүдөө нютагуудые хүгжөөлгын программаар ажал ябуулагдаха юм.
Автор: Эрдэни РАДНАЕВ
Фото: pixabay.com
