551
100 гэр эмшэдтэ гэhэн үүсхэл Буряад Уласай Арадай Хуралай 14-дэхи сессидэ түрүүлэгшын орлогшо Татьяна Мантатова дурадхаhан байна.
Ахын аймагта эмшэд дуталдана. Залуушуул тиимэ холо ошохоёо шармайнагүй. Энэ программын ашаар эмшэдые ипотекэ абахадань мүнгээр туhалха гэжэ түсэблэгдэнэ. Тус проектые "хүдөөгэй ипотекэ" гэhэн программатай хамтаруулжа ажаллуулха хүсэлэнтэй. Иимэ үүсхэлые "Единая Россия" намайхид үнгэрhэн сессидэ оруулhан байгаа.
Удхань ямар байхаб гэхэдэ, эмшэд ипотекэ абахадаа, тон түрүүн тэрэ мүнгэнэйнгөө 20-%-нь нэгэ дороо өөhэдөө түлэхэ, үлээшэ 80 хубииень улас бэе дээрээ даажа абаха гээд хэлэгдээ. Аймагуудта, имагтал холо оршодог аймагуудта, энэ үүсхэл ехэтэ дэмжэнэ. Эмшэд дуталдана, тиимэhээ энэ программын ашаар аймагууд руу ошохо бэзэ гэжэ hанагдана.
Ахын аймагай гулваа Матвей Мадасовай хэлэhээр,эмшэд үсөөн, манай холын аймаг ерэхэеэ зүрхэлнэгүй, болбосон түхэлтэй гэр үгы хадань залуу эмшэд ерэнэгүй. Ахын аймагта нарин шэглэлэй мэргэжэлтэй эмшэд ехэ дуталдана.
«Жилище» гэhэн үндэhэн программын ашаар, Ахын аймагта нэгэ хэдэн болбосон түхэлтэй гэрнүүдые бариха хүсэлэнтэйбди, тиихэдэнь эмшэдэй дутагдалай бэрхэшээл шиидхэгдэхэ тээшээ болохо аа гү гэжэ аймагай захиргаан hанамжална.
Хуулиин энэ проект зохёогшодой hанамжаар, уласай ерэхэ жэлэй бюджедтэ хубилалта оруулха хэрэгтэй болохо. Теэд тохёолдоhон бэрхэшээл шиидхэгдэхэ арга мүрөө олохо байха гээд найдана hэн.
Фото: pixabay.com
