​Буряад уласта хүдөөгэй зон нютагтаа гэр бариха аргатай

"Хүдөө нютагуудые хүгжөөлгэ" гэhэн гүрэнэй программа Буряад Уласта бэелүүлэглэдэнэ. Тэдэнэй нэгэн 3% хүнгэлэлтэтэй урьhаламжа болоно. Сэлэнгын аймагай ажаhуугшад эдэбхитэйгээр энэ хангалтада хүртэдэг болонхой

2020 онhоо хойшо уласай ажаhуугшад хүнгэлэлтэтэй урьhаламжа абаха аргатай болонхой. Ипотекын урьhаламжа 5 сая түхэриг хүрэтэр үгтэнэ. Энэ мүнгэн гэр барилгын гү, али худалдан абалгын хэрэгтэ үгтэдэг юм. Гүрэнэй энэ тэдхэмжэдэ хүдөөдэ ажаhуудаг зон хүртэхэ эрхэтэй. Тиимэhээ Улаан-Үдын арад зон энэ урьhаламжа абажа шадахагүй болоно. Сэлэнгын аймагай Хэмни hууринай Дамдин Ринчинов  урьhаламжын ашаар Гусиноозёрск хотодо квартира абанхай. 

Хүдөөгэй зоной дунда энэ тэдхэмжэ эрилтэтэй байна. Сэлэнгынхид Гусиноозёрск хотынгоо энэ программада ороhыень ехэтэ сэгнэнэ. Мүнөө үедэ 50 % мэдүүлгэ эгээл иишээ зөөхэ тухай абтанхай байна.

Хүнгэлэлтэтэй урьhаламжа "Россельхозбанк" үгэнэ гэжэ Сэлэнгын аймагай хүдөө ажахын хүтэлбэриин дарга Татьяна Базарова хөөрэбэ. Мүнөө үедэ 13 мэдүүлгэ зүбшөөгдэжэ, 13 сая түхэригэй урьhаламжа үгтэнхэй гэжэ тэрэ нэмэнэ hэн. Жэлэй дүүрэтэр үшөө 20 хүн гэр байраяа hайжаруулха аргатай. Хүдөөгэй нютагуудые хүгжөөхэ тухай гүрэнэй программа 5 жэлэй туршада хүдэлхэ юм. Федеральна hанhаа триллион сая түхэриг гаргашалагдахаар хараалагдана. Тиигэжэ энэ программын аргаар "Хүдөөгэй урьhаламжа" 3%-ээр лэ үгтэхэ зэргэтэй.