429
Буряад Уласта олон байратай гэрнүүдтэ квартирануудай сэн ургашаба. Мэргэжэлтэдэй тухайлhаар, тус байдал хэдэн шалтагһаа дулдыдана ха. Экономическа талаар доройтолго хадаа шалтаг боложо үгэнэ, тиин hонин гэхэдэ, Алас Дурнын федеральна тойрогой тэдхэмжын арганууд мүн лэ сэн бодолгын шалтаг болоно ха.
Улаан-Үдэ хотодо гэр байрын нэгэ гурабалжан метр 63 мянган түхэригтэ хүрэнэ. Харин үнэн дээрээ шэнэ гэрнүүд соо квартиранууд бүри үнэтэй. Шүүбэришэдэй тоолоhоор, сэнгүүдэй бодохо ушар хэдэн шалтагтай ха. Гол шухала, 2 жэлэй саана Буряад Улас Алас Дурнын тойрогто орожо, элдэб хүнгэлэлтэнүүдтэ хүртэжэ эхилээ. Нэгэнь гэхэдэ, арад зондо Алас Дурнын ипотекэ – 2%-тэй урьhаламжа абажа, гэр квартира абаха арга олгогдоо. Тиигэжэ, худалдан абаха зоной олошорходо, барилгашад үрдихэеэ болижо, сэн дээшэлбэ.
Мүнөө квартирануудта эрилтэ ехэ болоод байна, ушар гэхэдэ, ипотекэ олоор тараагдана, харин мэдүүлгэнүүд хомор, тиин гэр байраяа худалдаад, ондоо квартира зон абажа ядана гэжэ мэдээсэлэй түбэй хүтэлбэрилэгшэ Александра Зарубина тэмдэглэнэ.
Квартира хүлhэлхэ хэрэгтэ мүн лэ сэнгүүд ургаа. Жэл саана нэгэ таhалгатай байра 8-10 мянгаар хүлhэлхэ арга байгаа hаа, мүнөө 14 мянгаhаа доошо байха газар олохонь бэрхэтэй. Үни баригдаhан гэрнүүдэй дэлгүүртэ квартиранууд мүн лэ үнэтэй болобо. Нэгэ таhалгатай квартира 2 саяhаа 3 хахад сая түхэригтэ хүрэнэ гэжэ Александра Зарубина тэмдэглэнэ.
Байгша ондо пандеми ушаржа, барилгын hалбарида нүлөө үзүүлээ. Барилгашад дуталдана, хилын саанаhаа ерэhэн ажалшад Россиhаа гаража, бусабагүй. Харин барилгын яаман hалбариие хүл дээрэнь үлөөхэ, олон квартиратай гэрнүүдые, социальна байшангуудые саг соонь тушааха гэжэ оролдолго гаргана.
Мүнөө дээрээ нэгэшье объект тогдоогдоогүй гэжэ яаманай хэблэлэй албанай мэргэжэлтэн Елена Власова тэмдэглэнэ. Буряад Уласай засаг зургаан, Минстройтой болон подрядна эмхинүүдтэй хамта бүхы арга шадалаа гаргана ха. Хүдэлмэрилэгшэдые түргөөр бэлдэхэ hургуули байгуулагданхай гэжэ тэрэ хөөрэбэ. Сэнгүүдые бодхоохогүй гэhэн шухала хэлсээн гэр баригшадтай баталагданхай. Үшөө нэгэ арга гэхэдэ, Буряад Улас федеральна түсэлдэ орожо, байгша оной июль hарада инженерна инфраструктурын бүтээлгэдэ 770 сая түхэригэй мэдүүлэлгэдэ оруулагданхай. Яабашье, сэнгүүд ургаа, экономикын гуримаар, мэдүүлгэ дурадхалнуудай эрилтэhээ ехэ болоогүйдэ квартирануудта сэн доошолхогүй.
Фото: pixabay.com
