352
Налог тухай асуудал Арадай Хуралда зүбшэн хэлсэбэ. Буряадай эдэй засагта болон олзын хэрэг эрхилэлгэдэ тон шухала хуулиин энэ проект ерэхэ сессиин повесткэдэ оруулагдаhан байна.
Налог татабариин талаар шэнэ байгуулгада орохо тухай асуудал Арадай Хуралда нэгэтэ бэшэ зүбшэн хэлсэгдэнэ. 2021 оной январиин 1-hээ тусхай налогой талаар нэмэлтэ хубилалтануудай оруулагдаhан ушарhаа уласай бага олзын хэрэг эрхилэгшэд парламентэдэ хандаhан байна. Экономикын яаманай дурадхалаар, элдэб hалбаринуудай ябуулгада, тодорхойлбол, ургамалай, үхэр мал болон загаhа барилгын талаар, бог шорой үйлэдбэрилдэгшэдтэ, барилга эрхилэгшэдтэ, аяншалга хүгжөөгшэдтэ, ниигэмэй талаар хүдэлдэг олзын хэрэг эрхилэгшэдтэ олзо оршоhоо 3 процент налог дарагдаха. Гаргасын талаар 7 процент налог түлэхэ. Социальна удхатай проектнуудые ябуулдаг олзын хэрэг эрхилэлэлгэдэ, мүн hая бизнес эхилэгшэдтэ тон бага налог заагдаха. Налог тухай хуулиин проект hунгамалнуудай дунда тон шуяатайгаар зүбшэгдэбэ. Олон депутадууд дурагүй байhанаа мэдүүлээ. Экономикын яаманай талаар оруулагдаhан дурадхалнууд hунгамалнуудай hанаанда тааранагүй. Арадай Хуралай hунгамал Николай Дашеевай hанамжаар, налогой талаар оруулагдаhан нэмэлтын ёhоор, 5 дахин татабари ехэ болгогдохо зэргэтэй. Иимэл hанамжанууд депутадуудай талаhаа хэлэгдээ.
"Гол түлэб эгээл ехэ туhаламжа, дэмжэлгэ абаха ёhотой hалбаринууд зорюута шэлэгдэhэн шэнги. Эдэ жэлнүүд соо дээрэ хэлэгдэhэн hалбаринуудта гүрэнэй талаhаа ехэ дэмжэлгэ үзүүлэгдэдэг байгаа гээшэ. Мүнөө энэ асуудал арсалдаата", - гээд, hунгамал Иннокентий Вахрамеев хэлэнэ. Экономикын яаманда энэ асуудал үшөө hайнаар хаража үзэхэ, дутуу дундануудыень усадхаха тухай зүблөөн дээрэ хэлэгдээ. Налогой талаар хуулиин проект бүри hайнаар заhагдаха, нэмэлтэ хубилтанууд зүбөөр хэгдэхэ ёhотой гээд Арадай hунгамалнууд зүблөөн дээрэ хэлэhэн байна.
Фото: pixabay.com
