435
Наһанайнгаа амаралтада гараһан зондо нэгэ һарын туршада ажамидарха эгээн бага пенсиин хэмжээн баталагдаа. Тиигэжэ тэрээнһээнь уламжалан 2021 оной социальна нэмэлтын сэн элирүүлэгдээ.
Байгша оной ноябриин 26-да Арадай Хуралай ээлжээтэ сессидэ «2021 ондо наһанайнгаа амаралтада гараһан зондо нэгэ һарын туршада ажамидарха эгээн бага пенсиин хэмжээн» гэһэн хуули абагдаа. Тиигэжэ ерэхэ 2021 оной январиин нэгэнһээ наһанайнгаа амаралтада гараһан зоной эгээн бага пенсинь 10372 түхэригтэ хүрэхэ.
Буряад Уласта энээнһээ бага мүнгэн наһатайшуулда түлэгдэхэгүй. Мүнөө сагта эгээн бага хэмжээн 9207 түхэриг юм. Тиигэжэ ажамидаралай мүнгэн ерэхэ жэлдэ 12,7 процентээр ургаха байна.
10 жэлэй туршада федеральна хуулиин байгаа сагта наһажаал зоной ажамидаралай эгээн бага хэмжээнэй сэн Россиин пенсиин хэмжээнһээ ехэ болгогдоо. Тиин ерэхэ жэлһээ манай уласай наһатайшуул федеральна пенси абаха мүртөө, үшөө уласай нэмэлтэ абаха эрхэтэй болохо.
Тодорхойлон хэлэбэл, булта пенсионернууд энэ түлбэридэ хүртэхэгүй, харин ганса ажалладаггүй, пенсинь ажамидаралай хэмжээнһээ бага байбал тэрэ социальна түлбэри абаха эрхэтэй байха. Иимэ түлбэри абагшадай тоо, уридшалһан мэдээгээр, 50283 хүн гээд хэлэгдээ. Энэ хэрэгтэ Буряадай засаг газар 2021 ондо 100,5 сая түхэриг юм ха.
Фото: pixabay.com
