647
Арадай Хуралай һунгамалнууд 2021 ондо хүдөө ажахын һалбарида 2020 онһоо дутуугуйгөөр бюджетһээ мүнгэ үгэхэ хэрэгтэй гэжэ хэлэнэд. Газарай асуудалнуудаар, аграрна политикын болон хэрэглэлгын дэлгүүрэй хорооной һунгамалнууд Буряадай Засаг газарта мэдүүлгэ-дурадхалнуудаа оруулһан байна. Һунгамалнуудта эдэй засагай, хүдөө ажахын яаманайхид элидхэл хэһэн байна.
2021 ондо хүдөө ажахын һалбарида 1 милиард 077,5 сая түхэриг һомологдоо, тэдэнэй тоодо, уласай һанһаа - 441 сая, федеральна һанһаа - 639,1 сая түхэриг. Хүдөө ажахын үйлэдбэри хүгжөөлгэдэ нёдондо жэл 766,3 сая байгаа һаа, ерэхэ жэл 757,3 сая хүрэтэр унаа. Теэд бюджетһээ мүнгэнэй жааханаар нэмээшье һаа, амяараа программануудта мүнгэниинь хороогдоо.
2021 онһоо “Ажалаа эхилжэ байһан фермер”, “Гэр бүлын фермэ” гэһэн программанууд болюулагдахань. Энэ хоёр программада 164 сая үгтэдэг байгаа. Тэдэнэй орондо «Агростартап» программа бии болгогдожо, бэелүүлгэдэнь 84 сая түхэриг шэглүүлэгдэхэ. Мүн «Агропрогресс» гэһэн программада 63,8 сая тараагдаха.
Һунгамал Пётр Носковой тэмдэглэһээр, хүдөө нютагуудта арад зониие зөөлгэхэ ажал ябуулжа байһан аад, мүнгыень бага болгоно гээшэбта, нютагуудта баригдажа байһан һургуули, эмнэлгын газарнуудта хэн аргалуулха юм. Энээ ябадал буруу гэжэ тэрэ хэлээ.
Тиихэдэ мелиорацида, һүнэй үйлэдбэридэ мүнгэн орой багаар үгтэхэнь. Буряадай малай үүлтэр һайжаруулгын албанда баһал мүнгыень нэмэхэ хэрэгтэй гэжэ һунгамалнууд тобшолоо. Тиигэбэ яабашье, 2020 онойхитой адли хүдөө ажахыда мүнгэ үгэхэ хэрэгтэй гэжэ нэгэ шиидхэбэридэ хүрөө.
Фото: pixabay.com
