523
Түүхэтэ хүшөөнүүдые заhабарилгын хэрэгтэ юундэ инвесторнууд мүнгэ гаргашалнагүйб? Уласай ямар үйлэдбэринүүдтэ нэмэлтэ мүнгэнэй тэдхэмжэ хэрэгтэйб гэһэн асуудалнуудаар Буряадай Толгойлогшо Алексей Цыденовэй хүтэлбэри доро инвестиционно байдалай суглаанда хэлсэбэ.
Һүүлэй 2 жэлэй туршада барилгын hалбариин хүгжэлтэдэ уласай бюджедhээ ехэ мүнгэн гаргашалагдаа юм. Энэ тэдхэмжын ашаар олон гэрнүүд, социальна эмхинүүд, соёлой, тамирай болон эмнэлгын байшангууд баригданхай.
Тахал үбшэнэй hүжэрхэ үедэшье барилгын 300 шахуу эмхи ажалаа эршэтэйгээр ябуулhаар. Энэ сагта барилгашан мэргэжэлтэдэй дуталдабашье гэрнүүд бодхоогдожо, ашаглалгада тушаагдажа байна. Уласай барилгын ажалда 2 мянган ажалшад дуталдана гэжэ тэмдэглэлтэй. Тиин мүнөө хүдэлжэ байhан барилгашадай дунда наhан 50-hаа үлүү гаратар. Тиимэhээ залуу мэргэжэлтэд тон хэрэгтэй болонхой гэжэ "Буряадай барилгашад" гэhэн региональна эблэлэй хүтэлбэриин түрүүлэгшэ Геннадий Доржиев хэлэбэ. Энэ хадаа каменшик, бетонщик, арматурщик мүн лэ хүндэ ашаанай авто-унаа жолоодохо мэргэжэлтэд гэжэ тэрэ нэмэнэ hэн. Энээнhээ гадуур барилгын эмхинүүдтэ тусхайта барилгын техникэ худалдажа абаhан мүнгэ бусаалгын тэдхэмжэ хэрэгтэй ааб даа гэжэ энэ суглаанда тэмдэглэгдээ.
Гэбэшье, барилгын талаар шэнэ эрилтэнүүд ехэ болонхой. Жэшээнь, шэнэ квартирын эзэн бүхэндэ авто-унаагаа табиха газар хараалагдаха ёhотой. Энээнhээ боложо, шэнэ гэрнүүдэй хажууда амаралгын, нааданай мүн лэ тамирай талмайнуудта газар үлэнэгүй ха.
Барилгын hалбариhаа гадуур соёлой hалбари баhал тэдхэмжэдэ хүртэхэ гэжэ хүлеэнэ. Шухала бэрхэшээл гэхэдэ, инвесторнууд уласай түүхэтэ хүшөөнүүдые заhабарилгын хэрэгтэ мүнгэ гаргашалха дурагүй байна. Шалтагынь - хэрэгтэ хэрэггүй зүбшөөлгын олон саарhа данса суглуулжа, гар табилгын ажал болоно гэжэ "Проект Байкала" гэhэн архитектурна мастерскойн эмхиин генеральна захирал Бронислав Михайлов хэлэбэ. Энэ суглаанда хэлсэгдэhэн, мүн лэ дурадхагдаhан асуудалнуудаар хэрэгтэй саарhа данса бэлдэжэ, шиидхэхэ арга бэдэрхэбди гэжэ Алексей Цыденов тэмдэглээ.
Фото: pixabay.com
