501
Буряадай эдэй засагай сайд Екатерина Кочетова элидхэл эгээл түрүүн хэбэ. Нүгөө жэлэй олзо оршын мүнгэн ехэ болохо тухай уридшалан багсаамжалагдана. Уласай hанда 29 млрд түхэриг налогой болон налогой бэшэ мүнгэн орохо зэргэтэй. НДФЛ, олзо оршын болон акцизай налогhоо дээрэ хэлэгдэhэн мүнгэнэй хахадынь орохо байна.
Уласай ехээр налог түлэдэг зон тухай мүн лэ хөөрэлдөөн болоо.
"Түгнын уурхайн талаар олзо оршо ороногүй. Һайн дүнгүүдые харуулна. Харин олзонь үгы", - гэжэ hунгамал Михаил Степанов хэлэнэ.
"14-дэхи ТГК эндэ мүнгэ олоно, харин Үбэр Байгалай хизаарта мүнгэеэ гаргашална. Буряад уласта ороходоо, тон hайн байдалтай регионууд бии. Үйлэдбэринүүд региондоо мүнгэеэ оруулна ха юм", - гэжэ hунгамал Баир Цыренов тэмдэглэбэ.
Инвестиционно түсэлнүүдтэ ехэ мүнгэн гаргашалагдана. Татабариин хүнгэлэлтэнь хэдэн сая түхэриг бүридүүлнэ. Экономикын сайдай тэмдэглэhээр, иимэ проектнууд уласта тон шухала гэнэ. Уласай бюджедэй мүнгэ ехэ болгохо гэбэл, ликер хэдэг архиин үйлэдбэри нээхэ тухай дурадхал Анатолий Кушнарев оруулаа. Хэдэн миллиард түхэриг энэ түсэл асарха, промпарк соо үйлэдбэри хүгжөөлгэдэ hуури үгтэhэн байна.
"Мүнөө болотор энэ талмай хооhон зандаа. Энэ проектэдэ бага бэшэ мүнгэн гаргашалагданхай", - гэжэ сайд Екатерина Кочетова хэлэбэ. Бүхы яамануудые нэмэлтэ олзо оршын талаар ажал ябуулха тухай Арадай hунгамалнууд уряалба. Бага болон дунда олзын хэрэг эрхилэгшэдтэ ехэ дэмжэлгэ үзүүлэгдэнэ. Тиимэhээ уласай hан руу налогой мүнгэн ехээр орохо зэргэтэй.
Фото: pixabay.com
