​Ородой Холбоото Уласта дотоодын аяншалга хүгжөөхэ тусхай албан байгуулагдахань

Энээн тухай Ородой Холбоото Уласай Юрэнхылэгшэ Владимир Путин һаяхана эмхидхэгдэһэн хуралданаанай үедэ дуулгаба.

Тахал үбшэнэй һүжэрэн таража, гүрэнэй хилэнүүдэй хаб байса хаагдаад байха үедэ дотоодын аяншалга хүгжөөхэ гүрэнэй программа зохеогдоһон юм. Шэнэ түсэлэй бэелүүлгэдэ Буряад Улас эдэбхитэйгээр оролсоно.

Байгша оной июлиин долоонһоо Москва-Улаан-Үдэ шэглэлээр түрүүшын чартернэ самолёдууд ниидэжэ эхилээ. Буужа ерэһэн аяншалагшадта һайн шанартай хангалтануудые үзүүлхын тулада олон зон оролдоно. Хамтадаа 39 олзын хэрэг эрхилэгшэд энэ түсэлдэ хабаадана ха. Зунай амаралтын хаһын үедэ энэ самолёдоор 1528 аяншалагшад Буряад Улас ерэһэн байна.

Буряадай аяншалгын яаманай мэдээсэһээр, 2021 оной февралиин 6-һаа захилтаар ниидэдэг самолёдууд дахин хүдэлжэ эхилхэ юм. Тиимэһээ үбэлэй Байгалай үзэсхэлэн байгаали хараа үзөөдүй аяншалагшад иимэ аргатай болобо. «Уральские авиалинии» гэһэн бүлгэмэй самолёдууд энэ шэглэлээр ерэхэ жэлэй мартын 27 болотор ниидэжэ байха юм.

Нэмэжэ хэлэхэдэ, Буряад Уласаар аяншалжа, элдэб хангалтануудай түлөө түлэгдэһэн мүнгэнэй 20 хубинь эдэ зондо бусаагдадаг болонхой юм. Аяншалгын «кешбэк» гэжэ программада «Аршаан», «Горячинск» болон Байгалай эрьеэр оршодог 18 буудалнууд хабаадалсаа.

Владимир Путинай хэлэһээр, ерэхэ жэлдэ дотоодын аяшалга хүгжөөхэ хэрэгтэ үшөө ехэ мүнгэн һомологдохо. Аяншалгын «кешбэк» гэһэн программада 15 миллиард түхэриг хараалагданхай юм. Энэ жэлэй туршада 1,2 миллиард түхэриг түрэл оронойнгоо можо нютагуудаар аяншалһан эрхэтэдтэ бусаагдаа гээд, Буряад Уласай Засагай газарай мэдээсэлэй албан дуулгана.