​Хүүгэдтэй бүлэнүүдтэ туһаламжа үзүүлэгдэнэ

Халдабарита ханяаданай тараха үедэ Ородой Холбоото Уласай ажаһуугшадые дэмжэжэ, тэдэндэ туһаламжа үзүүлхын тулада 838 миллиард түхэриг гүрэнэй һанһаа шэглүүлэгдээ гэжэ Владимир Путин хэлэбэ.

Харин Буряад Уласай ажаһуугшадта тэдхэмжэ үзүүлхын тула 5 миллиард түхэриг гаргашалагдаһан юм. Ородой Холбоото Уласай Юрэнхылэгшын зарлигаар байгша оной апрелиин эхинһээ хүүгэдтэй гэр бүлэнүүдтэ 5-10 мянган түхэригэй тэдхэмжэ мүнгэн түлэгдөө. Үшөө тиихэдэ, апрель-июнь һарануудта гурба наһа гүйсэд хүсөөгүй үхибүүтэй айлнуудта 5 мянган түхэригэй туһаламжа үзүүлэгдэһэн юм. Тиигэжэ 3-16 наһанай хүүгэдтэй 133 мянган айл бүлэ арба мянган түхэригэй туһаламжада хүртэлсөө.

Ородой Холбоото Уласай Юрэнхылэгшын хэлэһээр шэнэ жэлэй урдахана долоотой үхибүүдтэй айлнуудта дахин 5000 түхэригэй туһаламжа үзүүлэгдэхэ. Энэ мүнгэ абахын тула мэдүүлгэ бэшэхэ хэрэггүй.