Буряадай мохин шанга даа!

2020 ондо Буряадай мохин «Вкусы России» гэһэн Бүхэроссиин харалганай “Турша, дурлахаш!” гэһэн номинацида  хабаадалсаһан гэжэ дуулаһан байнат. Мохи бэлдэдэг хубиин олзын хэрэг эрхилэгшэд, нэрлэбэл: ИП Петинов О.А. «Ларикс», ООО «Байкальская живица», ИП Грудинин Д.А. «Байкальская смолка» - эдэ гурбан болоно.

Буряадай мохи нэгэ дахин жажалжа туршаһан зон тэрэ амтыень хэзээдэш мартахагүй. Мохи бэлдэдэг олзын хэрэг эрхилэгшэд Ород Улас  дотор үнгэрһэн выставка-харалгануудта эдэбхитэйгээр хабаададаг байһандань, арад зон мохиной амта үзэһэн байхадаа, ехээр худалдажа абадаг байна. Янза бүриин мохинууд дуратайшуулда дурадхагдана. Заншалта, ууралай болон сонгоогдоһон аргаар хэгдэһэн мохин эгээн ехээр зондо һайшаагдана. Экологическэ сэбэр, шэнэһэн модоной дабирхайтаһан хултаһанһаа абагдаһан мохиндо элдэб янзын химиин бодосууд, будаг үгы гээшэ.

Бүхэроссиин эдеэ хоолой түрүүшын «Вкусы России» урилдаанда оролсоһоной түлөө, хубиин олзын хэрэг эрхилэгшэд уласхоорондын дэлгүүртэ гараха аргатай болоо”, - гэжэ Буряадай Засаг газарай Түрүүлэгшын орлогшо, Хүдөө ажахын болон эдеэ хоолой сайд Галсан Дареев тэмдэглээ.

Тэрэ урилдаанай дүнгүүдээр Буряадай олзын хэрэг эрхилэгшэдтэ өөрынгөө мохи Солонгосой, Вьетнамай болон Арабай холбоото Эмирадуудай үзэсхэлэнгүүдтэ хабаадаха эрхэ үгтэбэ. 2020 ондо Буряадта 16,4 тонно,  хамтадаа  3,3 сая түхэригтэ мохин бэлдэгдэһэн байна.