Һайн шанартай харгынууд олон болохо

Байгша оной туршада харгынуудые заһаха хэрэгтэ 12,5 миллиард түхэриг үгтэхэ. Буряадай транспортын, элшэ хүсэнэй болон харгын ажахын сайдай орлогшо Сергей Белоколодовой хэлэһээр:

Һомологдоһон мүнгэнэй 4,7 миллиард түхэригынь федеральна мэдэлэй харгынуудые шэнэлхэ хэрэгтэ дамжуулагдаха, бусадынь – 7,8 миллиард түхэриг уласай харгын жасада үгтэбэ. Иимэ ехэ мүнгэн түрүүшынхиеэ дамжуулагдажа, ехэхэн ажал хүдэлмэри хэгдэхэ. Түсэбэй ёһоор 2030 он болотор уласай 1800 модо харгынууд һайн шанартай болгоогдохо".

2003 ондо һэльбэн шэнэлэгдэжэ эхилһэн «Улаан-Үдэ – Турунтаево – Хурамхаан – Шэнэ Уоян» шэглэлээр харгы 2023 ондо дүүргэгдэхэ хараатай. Байгша ондо энэ харгын 20 модо шэнэлэгдэхэ юм. Бүхыдөө тус харгын 70 % шэнэлэгдэнхэй. Үшөө тиихэдэ асфальтобетон гурбан дабхар дэлгэгдэжэ, харгын тэмдэгүүд болон бусад шухала хэрэгсэлнүүдые табихань үлэнхэй. Энээнһээ гадна байгша оной дүүрэтэр Монгол Ороной хилэ хүрэтэр харгын барилга түгэсэхэ. 2021 оной туршада «Аюлгүй, һайн шанартай харгынууд» гэһэн үндэһэн түсэлэй ашаар уласай болон нютагуудай мэдэлдэ ородог 100 гаран модо харгынууд һэльбэн шэнэлэгдэхэ.