​Буряадай Баргажанай аймагта  сэбэрлэлгын 21 түхеэрэлгэ тодхогдохо

Байгал далайн байгаали хамгаалгын бүhэлүүртэ сэбэрлэлгын 21 түхеэрэлгэ тодхогдохо болоо гэжэ март hарада эли болоо һэн. Тиихэдэ Россиин Юрэнхылэгшэ Владимир Путин энээн тухай захиралта доро гараа табиhан юм. Тиигэжэ Ород Уласай мүнгэн hанhаа 14 миллиард түхэриг hомологдожо, бүхыдөө 21 объект баригдаха болоо. Тэдэнэй нэгэниинь Баргажанай Адагта оршохо юм.

Баргажанай Адагта 7 мянган зон ажаhуудаг. Байгал далайн эгээл эрье дээрэ байрланхай тула сэбэрлэлгын түхеэрэлгэнүүд тэндэ заатагүй хэрэгтэй бшуу. Үдэрэй турша соо 300 кубометр муухай хаядаhан сэбэрлэгдэхэ ёhотой ха юм. Түсэб зохёохо эмхи элирүүлэгдээ. Мүнөө тус эмхи ажалаа ябуулжа эхилэнхэй. Юрэнхылэгшын үгэhэн даабариин ёhоор, 2023 ондо Баргажанай Адаг болон Баргажан нютагуудта сэбэрлэлгын түхеэрэлгэнүүдые бариха ёhотойбди гэжэ Буряад Уласай барилгын болон гэрэй коммунальна ажахы шэнэлэлгын сайд Николай Рузавин тэмдэглээ. Үшөө нэгэ объект гэхэдэ, Улаан-Үдэ ниислэл хотоhоо Хурамхаан хүрэтэр харгы баригдаhаар. 10 жэлэй турша соо тус ажалые «Труд» компани бүтээнэ.

Байгша ондо 271-дэхи километрhээ 291-дэхи болотор хамта дээрээ hайн шанартай 20 модо утатай зам бариха түсэб бии. Барилгын шата бүхэндэ шалгалта хэгдэнэ. Тиимэһээ шанар һайтай харгы баригдаха гэжэ һанагдана. Энэ харгыда байгша ондо федеральна һанһаа нэгэ миллиардһаа нэгэ жаа багахан мүнгэн һомологдоо. Нёдондо 700 сая үгтэһэн байгаа гээд һануулая. Инфраструктурын талаар Буряадай Засагай газарай Түрүүлэгшын орлогшо Евгений Луковниковой хэлэһээр, федеральна һанһаа мүнгэ эрихэдэмнай үгэнэ. 2022 ондо 291-дэхи километрһээ 312-дохи километр хүрэтэр харгы бариха түсэб табигданхай. Тиигэжэ Баргажан нютаг хүрэхэбди гэжэ хэлээ. Намар болотор баригдажа байһан харгын участок дүүргэгдэхэ ёһотой.