«Буряад орондо ажаһууха, һураха ба хүдэлхэ!»

 –Харахадамни, үхибүүд булта нюдэндөө галтай, элшэ хүсэтэй, һайн бо­долнуудтай байна. Тэдэ ажал хэхэ, урагшаа дабшаха ехэ эрмэлзэлтэй. Буряад Улас аргагүй түргэн хүгжэнэ, хүрэнгэжүүлгэ дээшэлһээр. Манай нютаг можын эдэй засаг хүгжэлтэ абаһаар. Тиимэһээ манда ажал хэхэ зон, мэргэжэлтэд тон хэрэгтэй. Хүсэһэн мэргэжэлээ оложо, эрилтэ ехэтэй, бэрхэ хүдэлмэрилэгшэдэй тоодо орожо, бата бэхи бүлэ байгуулжа, таанадай хэрэг үргэлжэлүүлхэ олон үхибүүдтэй болохы­етнай хүсэнэб. Танилсагты, үзэгты, нүхэсэгты, урагшаа дабшагты, - гэжэ хуралдаанда хабаадагшадта Буряад Уласай Толгойлогшо Алексей Цыде­нов хандаба.

Буряадай болбосоролой эмхи зургаанууд - тусхай мэргэжэлэй ба дээдэ һургуулинууд - амжалтанууд­таяа танилсуулба.

- Манай һуралсалай эмхи барил­гын һалбарида мэргэжэлтэдые бэл­дэдэг 50 эрхимүүдэй тоодо ороо. Хэм­жээ ябуулгада бидэ барилгын ба шэ­мэглэлгын ажалай мэргэжэлтэй та­нилсуулнабди, ерээдүйн мэргэжэл­тэдтэ материалнуудые, зэбсэгүүдые харуулнабди. Мүнөөдэр манай техникумдэ 75 хүн һурана. Бүхы 18 мэр­гэжэлдэ конкурс ехэ байдаг. Техни­кум дүүргэгшэд булта ажалтай бо­лодог. Уласай барилгын һалбарида ба хотын ажахыда хүдэлхэеэ үлэдэг. Үшөө тэмдэглэхэ зүйл гэхэдэ, оюутад бата бэхи бүлэнүүдые байгуулдаг. Иигэжэ һуралсал ба мэргэжэл хуби заяануудые холбоно, - гэжэ Барил­гын ба хотын ажахын техникумэй за­хиралай орлогшо Андрей Гомбоев хөөрэбэ.

«Буряад орондо ажаһууха, һураха ба хүдэлхэ!» гэжэ нэрлэгдэһэн ху­ралдаан нэгэ үдэрэй туршада үнгэргэгдөө. Хуралдаанай програм­мада туһатай дадал шадабариин болон IT-компанинуудай үзэсхэлэн дэлгээгдээ, сэсэ буляалдалгын тал­майнууд хүдэлөө, мастер-клас­сууд үнгэргэгдөө, уран һайханай бүлгэмүүдэй тоглолто болоо. Хурал­даанай үедэ арбан талмай хүдэлөө: хүнгэн ба эдеэ хоолой үйлэдбэ- ри, барилга, хотын ажахы ба хада уулын үйлэдбэри, креативна индустри, элшэ хүсэн, IT ба телекомму­никацинууд, эмнэлгэ, болбосорол, хүдөө ажахы, ой модоной үйлэдбэри ба байгаали хамгаалга, машина бүтээлгэ ба транспорт.

Буряад Уласай ажал дурадхаг­шад хуралдаанда хабаадагшадта эгээ эрилтэтэй мэргэжэлнүүд тухай, ашаг үрэтэй олзын хэрэг эрхилэлгын һанал бодолнууд тухай хөөрөө, харин һурагшад тэдэниие ехэ һонирхон шагнаа.

Эрдэмэй туйлалтануудтай танилсаа

Эрдэмэй ба технологинуу­дай «Технофест» гэһэн II фестивалиин нээлгэ болобо. Зүүн Сибириин гүрэнэй технологиин ба хүтэлбэриин ехэ һургуулида: «Про-Авиа», «Про- Техно», «Про-Био», «Про-Агро» гэжэ нэрлэгдэһэн дүрбэн талмай хүдэлбэ.

Үхибүүдые ба ехэшүүлые Бу- ряад Уласай үйлэдбэриин амжал­тануудтай, саашанхи хараа бодол­нуудтай танилсуулха гэһэн гол зорилго фестивалиин урда табиг­даа. Уласай 30 гаран эмхи зургаа­нууд ба үйлэдбэринүүд интерак­тивна үзэсхэлэнгүүдые бэлдэжэ дэлгээгээ, мастер-классуудые ба элдэб конкурснуудые үнгэргөө. Үйлэдбэринүүд руу автобусуудаар эмхидхэгдэһэн экскурсинууд мүнөө жэлэй фестивалиин онсо шэнжэ бо­лоо.

- Манай һурагшадта ба оюутад­та Буряад ороной үйлэдбэринүүдэй амжалтануудтай ба саашанхи ажаябуулгатайнь, эрилтэ ехэтэй мэргэжэлнүүдтэй танилсаха арга бо­ломжо үгтэбэ гээшэ. Улаан-Үдын, уласай аймагуудай үхибүүд инже­нерэй мэргэжэлтэй дүтэ танилсажа, мүнөө сагай техникэ хараба. «Улан- Удэстальмост», Байгалай бүд нэхэдэг комбинат, «Ориентал Вэй» фабрика, «Бурятмяспром», «Буряадай һүн», «Берёзка» гэжэ фабрика, эд бараанай «ВИК» фабрика, хилээмэ бол­годог газар, «Россети» гэжэ хотын үйлэдбэринүүдтэ экскурсида ошоо. Манай уряа үгэ: «Буряад орондо ажаһууха, һураха, ажаллаха!», - гэжэ Буряад Уласай Толгойлогшо Алек­сей Цыденов тэмдэглээ.

«Технофест» фестивалиин тал­май дээрэ Буряад Уласай Засагай газарай дэргэдэхи координацион­но Зүблэлэй үргэдхэмэл суглаан үнгэргэгдөө. Фестиваль ерээдүйн мэргэжэлтэдэй ба ажал дурадхагша­дай хоорондо харилсаа байгуулха талмай болоо. Хабаадагшад тобшо­лол хэдэг мэргэжэлтэдтэ асуудалнуу­дые табяа, Буряадай түрүү компани­нуудай ажалай сүлөө һууринууд ба стажировко тухай мэдэжэ абаа.

- «Технофест» манай нютаг можын эрдэмэй ба технологическа амжал­тануудтай залуушуулые танилсуулха шухаг талмай болоо. Залуу үетэниие инженерэй мэргэжэлдэ анхаралаа табижа, арга зүйнүүдые үзэхэ эрмэл­зэл тэдээндэ түрүүлхэ гэжэ оролдо­нобди. Мүнөө жэлэй фестиваль аяар 5 мянга гаран һурагшадые суглуу­лаа, - гэжэ Зүүн Сибириин гүрэнэй технологиин ба хүтэлбэриин ехэ һургуулиин ректор, профессор Игорь Сизов хэлэбэ.

Буряад Уласай Засагай газар, Зүүн Сибириин гүрэнэй техноло­гиин ба хүтэлбэриин ехэ һургуули, Буряад Уластахи «Россиин маши­на бүтээгшэдэй эблэл» тус хэмжээ ябуулга эмхидхээ. Улаан-Үдэ хотын захиргаанай Ниигэмэй ба за­луушуулай бодолгын хороон ба Түрүүшүүлэй хүдэлөөнэй нютаг мо­жын таһаг дэмжэлгэ үзүүлээ.