​Шухала захил

«Газпром» ПАО-гой Правлениин Түрүүлэгшын орлогшо Виталий Маркелов, «Ростех» Госкорпорациин бүридэлдэ ородог «Россиин вертолёдууд» АОгой юрэнхы захирал Андрей Богинский гэгшэд далай дээгүүр ниидэхэ Ми-171А3 түхэлэй вертолёдуудаар стратегическэ хангалга тухай хэлсээ баталаа.

Ми-171А3 – энэ нэн түрүүн оффшорно операцинуудые (далай дээгүүр пассажирнуудые ба ашаа зөөхэ) дүүргэхэ гэжэ манда бүтээгдэһэн түрүүшын вертолёт болоно. Тэрэ нефть болон газ үйлэдбэрилдэг Уласхоорондын нэгэдэлэй (IOGP) баталһан эрилтэнүүдтэ тааруулагдан бүтээгдэһэн юм.

Агаарай энэ онгосын агаарта дэгдэхэ шэгнүүрынь 13 тонно юм. Ми-171А3 уһанай нюруу дээгүүр аюулгүйгөөр ниидэхэ бүхы эрилтэнүүдтэ харюусаһан онгосо болоно. Хэдышье орёо байгаалиин уларилда хэрэглэхэ цифровой навигационно түхеэрэлгэтэй энэ онгосо аварида эсэргүү тоһо түлишын оньһотой, уһанда бууха хэрэгсэлнүүдтэй юм.

 - Цифровой технологинуудые хэрэглэһэнэй ашаар «Россиин вертолёдууд» холдингын нэгэдэлнүүд эблэржэ, Ми-171А3 бүтээгээ. Тиигээд энэ шэнэ үеын вертолёт имагтал манай Улаан-Үдын авиационно заводто суглуулан хабсаргагдаха болоһондонь ехэ баяртайбди. Энэ хэлсээн Улаан-Үдын авиазаводой ажалшадые хэдэн жэлдэ таһалгаряагүй ажалтай байлгаха болоно, - гэжэ Буряад Уласай Толгойлогшо Алексей Цыденов мэдүүлээ.

 Вертолёт хоёр янзаар бүтээгдэхэ юм. Нэгэдэхинь – 24 хүниие болон 5 тонно ашаа зөөхөөр суглуулагдаха. Хоёрдохинь – бэдэрэлгэ-абаралгын операцинуудые үнгэргэлгэдэ хэрэглэхээр тусхайтаар оньһожоруулагдаһан, тэрэ тоодо эмнэлгын хэрэгсэлнүүдээр хангагдаха юм. Хэрэгтэй болоо һаань, грузопассажирска вертолёдые эзэниинь өөрөө бэдэрэлгэ-абаралгын онгосо болгожорхихо аргатай.

 Ми-171А3 онгосын жэшээ болохо янзань Уласхоорондын авиационнокосмическэ МАКС-2021 салоной үедэ олондо харуулагдаа.

 Хэлсээнэй ёһоор, Ми-171А3 вертолёдой жэшээтэ янзын туршалгануудые үнгэргэлгые, саашадаа олоор бүтээлгые ба сертификаци гаргалгые «Россиин вертолёдууд» гэһэн акционернэ бүлгэм бэе дээрээ даажа абаа. Мүн баһа агаарай онгосонуудые хангалгын болон онгосо жолоодохо лётно-техническэ мэргэжэлтэдые һургалгын, бэлэдхэлгын түбүүдые байгуулха. «Газпром» Ми-171А3 вертолёдуудые хэрэглэхэдээл абажа байхаар, заһабарилга болон хангалга захихаар хараална. Эдэ вертолёдуудые ехэнхидээ континентальна шельфнүүдтэ оршодог нөөсэнүүдтэ хэрэглэхэеэ түсэблэнэ.

Баримта

«Россиин вертолёдууд» холдинг – дэлхэйн вертолёт бүтээдэг һалбариин түрүү үйлэдбэринүүдэй нэгэн. Харин Россиида вертолёдуудые зохёодог ба бүтээдэг ганса үйлэдбэри болоно. Холдинг 2007 ондо байгуулагдаһан юм. Гол офисынь Москвада оршоно. Холдингын бүридэлдэ табан вертолётно заводууд, хоёр конструкторска бюро, мүн баһа хэрэгтэй хэрэгсэлнүүдые бүтээдэг ба хангалгын ажахынууд, авиаремонтно заводууд болон Россиида ба гадаадашье оронуудта худалдагдаһан вертолёдуудые хангалгын компани ородог. Холдингын бүтээлнүүдые худалдан абагшад – Россиин Хамгаалалгын яаман, Дотоодын хэрэгүүдэй яаман, Россиин МЧС болон гүрэнэй бэшэшье захилшад, «Газпром авиа» авиакомпани ба UTair, российска болон гадаадын ехэ ехэ компанинууд болоно.