​Паралимпиин наадан: түгэсхэлэй дүнгүүд

Японой Токио хотодо үнгэргэгдэһэн Паралимпиин нааданууд түгэсэбэ. Ородой суглуулагдамал командын гэшүүд 118 медаль абажа шадаа. Буряадай тамиршад хоёр алтан, нэгэ мүнгэн медальнуудта хүртэжэ, Ород гүрэнэй амжалтада өөрын хубита оруулаа гэхэдэ, алдуу болохогүй.

Үшөө дахин Михаил Асташов

Буряадаймнай хүл гаргүй тамиршан августын 31-дэ хоёрдохиёо алтан медаль абаһан байна. Шоссе дээгүүр велосипедээр урилдаанай 16 модоной зайда тэрэ түрүүлһэн байна. Эндэ хабаадаһан 11 тамиршадай нэгэнииньшье Михаилые хүсөөгүй.

Сентябриин 2-то аадар бороотой үдэр байбашье, велосипедээр урилдаашад 79 километр зай гаталаа. Гурбан бүлэгтэ ородог эрэмдэг бэетэй тамиршад эндэ бэе бэетэеэ тэмсээ. Тиигэжэ эгээл хүндэ үбшэнтэй Михаил Асташов шангай һуурида гаража шадаагүй.

Паралимпиадын үшөө дүүрээгүй байхада, Ородой бүлэг тамиршад Москва ниидэжэ ерээ. Михаил Асташов угталгада сугларһан олон тоото зоной анхарал тон ехээр татаһан байна. Юуб гэхэдэ, 2020 оной эхиндэ Екатеринбург хотодо Михаил халуун эдеэ хоол гэр гэрээр зөөгшөөр нэгэ үдэр хүдэлжэ үзэһэн байна. “Паралимпиада ошохоёо мүнгэ олоноб”, - гэжэ гасаалхадань, ехэнхи хуби сурбалжалагшад энээн тухай мүнөө болотор һануулан бэшэхэдэнь харамтай.

- Би эгээл эрхим бэшэб. Эдэ наадануудта хабаадаһан тамиршан бүхэн эрхим юм гэжэ хэлэхэ аргатай. Саашадаа арга шадалаараа һорилго хэжэ, үндэр амжалтануудаа үргэлжэлүүлхэл байхаб, - гэжэ олон үгэ хэлэнгүй, Михаил Асташов мэдүүлээ.

 “Шереметьево” дээрэ угталгын үедэ Михаил Асташов олондо сошордомо мэдээсэл дуулгаба. Ерэхэ үбэл тэрэ санаар ябажа һураха һанаатай. Михаилай зүдхэмжые мэдэһэн хүнүүд: “Энэшни шадахал, үбэлэйшье Паралимпиада ошоболнь, гайхахагүйбди”, - гэлсэбэ.

Мүнөө үедэ Михаил Асташов болон Баир Шигаев гэгшэд “Озеро Круглое” гэһэн һорилгын бааза дээрэ амаржа, 10 үдэрэй карантинда байна. Ород гүрэнэй Юрэнхылэгшэ Владимир Путинтай уулзаад, гэртээ бусаха юм.

Байгал далайн хүсэн

Һур харбалгаар суглуулагдамал команда Токио ошохынгоо урда Байгал далайн эрьедэ хэдэн үдэрэй бэлэдхэл хэһэн байна. Энэнь һайн дүн асарба. Паралимпиин талмай дээрэ һур харбагшад гурбан медальда хүртөө. Эдэ амжалтанууд командна микст тоосоондо туйлагдаа гээшэ.

Блочно түхэлэй номо һуршаар харбалгада Буряадаймнай Баир Шигаев Саха (Яхад) Уласай Степанида Артахиноватай хүрэл медальда хүртөө гэжэ урдахи дугаарта дуулгаа һэмди.

Хүзүүгээ гэмтээһэн тамиршадай дунда Елена Крутова болон Алексей Леонов гэгшэд шангай 3-дахи һуури эзэлжэ шадаа.

Паралимпиадын түгэсхэлдэ Ородой харбаашад алтан медаль абаа. Классическа номо һуршаар харбадаг Кирилл Смирнов болон Маргарита Сидоренко (зураг дээрэ) шанга тэмсээнүүдэй удаа Паралимпиин чемпионой нэрэ зэргэдэ хүртөө.

Маргарита Сидоренко Красноярска хизаарһаа уг гарбалтай. Мүнөө үедэ Краснодарска хизаарта ажаһууна. Кирилл Смирнов Үбэр Байгалай хизаарай Шэтэ хотын эрхэтэн юм. Буряад угтай мэдээжэ һоригшод Светлана Жигжитова, Цыден Анандаев гэгшэд амжалтыень хубаалдана.

Монголой алтан

Токиодо Монголой эрэмдэг бэетэй тамиршад ори ганса медальда хүртөө. Энэнь алтан байшоо. Пауэрлифтингдэ Энхбаярын Содномпилжээ шалгараа.

107 килограмм хүрэтэр шэгнүүртэ Монголой тамиршан 245 килограммай штанга хэбтээд үргэжэ шадаа. Иигэжэ тэрэ Паралимпиин рекорд харуулһан байна.

Э. Содномпилжээ Монголдоо мэдээжэ тамиршан юм. Хоёр дахин дэлхэйн чемпион болоһон намтартай. 2019 ондо дэлхэйн чемпионадта рекорд табижа, Гиннесэй номдо оруулагдаһан.