​Буряад Улас болон Эрхүү можо Сбербанктай зүблөө үнгэргэбэ

Буряад Уласай Толгойлогшо Алексей Цыденов болон Эрхүү можын амбан захирагша Игорь Кобзев Сбербанкын правлениин хүтэлбэрилэгшын орлогшо Александр Ведяхинтай инвестициин талаар асуудалнуудаар зүблөө үнгэргэбэ. Суг ябуулагдаха ажал тухай тэдэнэр мүнгэ хүрэнгэ оруулагшадта зорюулагдаһан road show «Байкал» промо-турай хэмжээндэ  сентябриин 28-да хэлсэһэн байна.

Хэмжээ ябуулгада аяншалгын талаар федеральна агентствын хүтэлбэрилэгшэ Зарина Догузова, «Туризм.РФ»  корпорациин юрэнхы захирал Сергей Суханов, олзын хэрэг эрхилэгшэ, инвестор Владислав Свиблов, «Космос ОГ» бүлгэмэй хүтэлбэрилэгшэ эмхиин юрэнхылэгшэ Александр Швейн, мэдээжэ композитор, «Фамилия» компанинуудай бүлэгэй хүтэлбэрилэгшэ Александр Шульгин гэгшэд хабаадана. 

Сбербанкын правлениин хүтэлбэрилэгшын орлогшын хэлэһээр, Эрхүү можо Буряад Улас хоёр Байгал гэһэн нэгэ макрорегион болгон хараалагдажа байһан инвестициин шой ехэ һонирхолтой.

- Эдэ можо нютагуудтай ажал бидэндэ һайхашаагдана. Эдэ регионуудта ороһон инвесторнуудай ажал ехэ урагшатай байха гэжэ һананабди, нэгэдэхеэр, эдэ можонуудай засаг зургаанай ажал ойлгосотой, тодо, инвесторнүүдтэ зохид оршон. Энэ бидэндэ ехэ таарана, эдэ можонуудта хүдэлхэ партнёрнуудта һайхашаагдана. Суг ажал тухай хэлэхэ болоо һаа, рекреацитай хабаатай түсэлнүүдые хүгжөөнэбди. Байгал хадаа ариг сэбэр, тунгалаг һайхан далай, тэрэнэй уһан Америкын ехэ табан нуурнуудай уһанһаа ехэ. Мүнөө ганса энэ рекреацида 1,5 миллиард түхэригэй урьһаламжа һомологдонхой, 12 миллиард түхэриг үгтэхөөр хараалагдана, бүхыдөө 40 миллиард хүрэжэ болохо - энэ хадаа горитой мүнгэн, - гэжэ   Александр Ведяхин тэмдэглэбэ.

Байгалай можодо алта, ашагта малтамалнуудые олзоборилхо талаар үйлэдбэри хүгжөөлгэдэ Сбер анхаралаа хандуулжа,можо нютагай болон инвесторнуудай хүгжэхэ талаар ажал ябуулна.

- Мүнгэн һангай болон институционно туһаламжа үзүүлнэбди. Сберэй хүсэ шадал, дэлисэ урматайгаар эдэ можонуудта шэглүүлхэбди, - гэжэ Александр Ведяхин хэлэбэ.

Буряад Улас олон асуудалнуудаар Сбертэй суг ажал ябуулна гэжэ уласай хүтэлбэрилэгшэ Алексей Цыденов хэлэбэ.

 - Нэн түрүүн, Сбер хадаа улас дотор олзын хэрэг эрхилэлгэ хүгжөөлгын шухала финансова институт, тэрэ тоодо, бюджетнэ урьһаламжын талаар уласай бюджет дэмжэнэ. Гэхэтэй хамта, мүнгэн һангай харилсаанһаа гадуур олон нэмэлтэ һалбаринуудта суг ажалланабди. COVID үбшэнтэй тэмсээнэй хэмжээндэ Сберэй цифровой продуктнуудые хэрэглээбди, уушханай буулгабринуудые сэгнэхэ, шэнжэлхэ талаар хэмэл интеллект ашаглаабди. Олон үхибүүдтэй бүлэнүүдые гэртэй болгохо талаар программануудаар Сбертэй хүдэлнэбди. Мүнөө Сбер мүнгэ һомологшо талань болонхой. Гэр байрын ажахын туһаламжын талаар мэдээсэлэй-тоололгын түб байгуулха талаар ажал ябуулагдана. Эндэ баһал Сберэй үйлэдбэри харанабди. Энэ асуудалаар хэдэн аргануудые хараалжа, Сберэй дурадхаһан арга бидэндэ эгээл тааруу.  Тиихэдэ гэр байра бариха талаар ехэ программатайбди, уласта мүнгэ хүрэнгэ оруулагшадта барилгын һалбарида урьһаламжын талаар Сбер дэмжэхэ аргатай.  Энээнһээ гадна, ашагта малтамалнуудые олзоборилхо талаар ехэ түсэлнүүдтэйбди - улас дотор бэелүүлэгдэжэ эхилһэн бүхы түсэлнүүдэй сэн 100 миллиард түхэригһөө дээшэ. Эндэ баһал мүнгэн һангай дэмжэлгэ хэрэгтэй. Нэмэжэ хэлэхэдэ, мүнөө бидэнэй анхаралаа хандуулһан аяншалгын һалбари - Сбертэй ганса инвестортэй гээд харилсаха түсэбтэй бэшэбди. Мүнөө энэ асуудалаар ажал ябуулагдана, Сбертэ бидэ газар, харилсаха арга, гүрэнэй талаар дэмжэлгэ, Алас Дурнын тойрогой шэглэлээр - урьһаламжын эмхидэ бэшэ, харин инвестортэ гээд налог татабариин хүнгэлэлтэ үзүүлхэбди. Суг ажал ябуулха арга боломжонууд олон. Тиихэдэ Сберэй командын түргэн дары, һонирхолтой бодолнуудтай байһаниинь тэмдэглэлтэй, мүнөө туйлагдаһан дүнгүүд ерээдүйн түсэбүүд бата бэхеэр харагдана, манай хараалһан дүнгүүд түргэн, ашаг үрэтэйгөөр туйлагдаха, - гэжэ Алексей Цыденов онсолбо.