​Байгалай болон Алтайн аяншалгын 11 дэбисхэр хүгжөөхэ талаар «Туризм.РФ» корпораци түсэбүүдтэй танилсуулаа

Ородой Холбоото Уласай Засагай газарай Түрүүлэгшын орлогшо Дмитрией Чернышенко болон «Туризм.РФ» корпорациин захиралнуудай зүблэл хамта Эрхүү можодо, Буряад болон Алтай Уласуудта аяншалгын 11 дэбисхэр хүгжөөхэ талаар түсэб байгуулаа. Суглаанда Олег Хорохордин, Игорь Кобзев, Алексей Цыденов гэгшэд хабаадаа.

Дмитрий Чернышенкын хэлэһээр, һаядаа корпораци «Туризм и индустрия гостеприимства» гэһэн үндэһэн түсэлэй хэмжээндэ мастер-түсэбүүдые байгуулжа эхилхэ. Ажалай үедэ аяншалгын дэбисхэрнүүдэй тоо олон болгогдожо болохо.

«Аяншалгын 11 дэбисхэрэй табаниинь Эрхүү можодо болон Буряад Уласта, зургааниинь – Алтай Уласта. Эдэ газарнууд аяншалагшадай анхарал татадаг. «Туризм.РФ» корпорациин хүгжэлтын түсэбүүд можо нютагуудай болон ажаһуугшадай һонирхол хараалжа, ниигэмэй ашаг үрэтэй. Тиигэжэ можо нютагууд руу аяншалагшадай тоо олошоруулагдахаһаа гадна, жэлэй дүрбэн сагта амаралгын оршон, ажалай нэмэлтэ һууринууд байгуулагдаха, бюджедэй олзо дээшэлүүлэгдэхэ. Корпорациин экспертнүүдэй уридшалһан тоололгоор, Алтай, Буряад Уласуудта, Эрхүү можодо аяншалгын инфраструктура хүгжөөлгын ашаар 40 мянган тухай ажалай һууринууд байгуулагдаха. 2036 он болотор эдэ можо нютагуудай олзонь жэлэй 600 миллиардһаа дээшэ байжа болохо. Гэхэтэй хамта, «зэрлиг» аргаар бэшэ, харин цивилизованна амаралта хүгжөөһэнэй ашаар, байгаалиин онсо дэбисхэртэ хүнүүдэй хохидолтой нүлөө бага болохо гэжэ онсолон тэмдэглэхэ байнаб, - гэжэ Дмитрий Чернышенко хэлэбэ.

Концепцинүүд бэелүүлэгдэжэ, 2035 он болотор Байгал болон Алтай хүрэтэр үшөө олон аяншалгшад һаадгүй хүрэхэ аргатай болохо гэжэ Туризм.РФ корпорациин захирал Сергей Суханов тоолоно. «Инфраструктура хүгжөөһэнэй ашаар, Алтай болон Байгалда аяншалагшадай үшөө удаан сагта амарха болзор дээшэлүүлхэбди», - гээд, Сергей Суханов тэмдэглэнэ.

Захиралнуудай зүблэлэй түсэбүүдые абаһанай удаа эдэ дэбисхэрнүүдэй мастер-түсэбүүд тодорхойлогдохо: «Мүнөу баталагдаһан концепцинүүд мастер-түсэбүүдэй үндэһэн болохо, саашадаа 11 дэбисхэрэй хүгжэлтын мүнгэн һангай хэб тодорхойлогдохо. Энэ шатада хубиин инвесторнуудые хабаадуулхабди, аяншалга хүгжөөхэ талаар олон инвесторнуудай хабаадахын түлөө ажал ябуулхабди», - гэжэ Суханов хөөрэбэ.

2,4 сая ажаһуугшадтай 385,4 мянган ажаһуугшадтай Эрхүү можо болон Буряад уласта ниитэ нэгэ мастер-түсэб байгуулагдаха. Ойхон, Түнхэн, Эрхүү-Тальцы, Байкальск – Выдрино, Турка –Горячинск гэһэн газарнууд хүгжэхэ. Эдэ дэбисхэртэ зошод буудалнуудай 38 мянган номернууд дуталдана.

Тиихэдэ эдэ можонуудай транспортын инфраструктура хубилха. Эрхүүдэ шэнэ аэропорт бариха, Улаан-Үдын аэропорт һэльбэн шэнэлхэ гэжэ Туризм.РФ корпорациин мэргэжэлтэд тон түрүүн бэелүүлэгдэхэ зорилгонуудай нэгэн гэжэ тоолоно. Гэхэтэй хамта, бага авиаци болон уһанай зам байгуулха гэжэ хараалагдана.

«Байгалай дэбисхэр хүгжөөһэнэй ашаар, Эрхүү можодо - ажалай 15,9 мянган һуури, Буряад Уласта 16,1 мянган һуури байгуулагдаха», - гэжэ Дмитрий Чернышенко нэмэбэ.

Алтайда Жемчужина Алтая, Мультинские озера, Чулышман, Каракольска болон Телецкэ нуурнууд шадарай дэбисхэр хүгжөөхэ. Ородой эгээл гоё харгы болохо Чуйска тракт шадарай харгыдахи туһаламжын һужаа хүгжөөлгэ аяншалгын амяараа дэбисхэртэ оруулагдаа.

Тиихэдэ Алтай Уласта зошод буудалнуудта 14 мянган номернүүд хэрэгтэй. Концепции ёһоор, автомобилиин харгынууд хэгдэжэ, тэдэ Алтайн аяншалгын түбүүдые холбохо, Горно-Алтайскын болон бусад аэропортнууд һэльбэн шэнэлэгдэхэ. Телецкэ нуурай хойто, урда зүгтэ уһанай бага онгосонуудай тогтохо газар баригдажа, уһанай зам эмхидхэгдэхэ. Туризм.РФ корпорациин түсэбүүд бэелүүлэгдэжэ, Алтай Уласта 10,5 мянган ажалай һууринууд байгуулагдаха.