Буряад Уласай Түнхэнэй үндэһэтэнэй парк Антон Будунов толгойлхо

Уласай Байгаалиин нөөсын ба байгаали хамгаалгын сайдай орлогшын тушаалһаа Антон Будуновые сүлөөлхэ тухай зарлигта Буряад Уласай Засагай газарай Түрүүлэгшын орлогшо Всеволод Мухин гараа табиба. Майн 5-һаа Антон Будунов Түнхэнэй үндэһэтэнэй паркын захиралай тушаалда орохо юм. Тусхай захиралта Россиин Байгаалиин нөөсын ба байгаали хамгаалгын сайд Александр Козлов гаргаа.

Будунов Антон Александрович 1983 оной ноябриин 27-до Хурамхаанай аймагай Майский тосхондо түрэһэн. 2005 ондо тэрэ Зүүн Сибириин гүрэнэй технологическа университет «Инженер- эколог» мэргэжэлээр дүүргээ, харин 2006 ондо «Юриспруденция» мэргэжэлтэй болоо. Тиихэдэ 2009 ондо Сибириин Гүрэнэй албанай академи дүүргэжэ, «Гүрэнэй ба нютагай засагай хүтэлбэри» гэһэн мэргэжэлтэй болоо һэн. Университедтэ һуража байхадаа, мүн тэрэнээ дүүргэһэнэй удаа Буряадай гүрэнэй Академическа оперо болон баледэй театрта программистаар хүдэлөө. 2007 оной апрель һарада Буряад Уласай Байгаалиин нөөсын ба байгаали хамгаалгын таһагта ажалтай болоо. 2009 оной июнь соо яаманай мэдээсэлэй нөөсэнүүдэй ба технологинүүдэй таһагта,  2009 оной ноябрь һараһаа 2010 оной январь болотор Буряад Уласай Засагай газарай Түрүүлэгшын орлогшын зүбшэлэгшээр ажаллаа. Удаань Буряад Уласай Хүдөө ажахын ба эдеэ хоолой яаманда хүдэлжэ эхилээ. 2016 оной март һараһаа Буряад Уласай Байгаалиин нөөсын ба байгаали хамгаалгын гүрэнэй экологтческа шалгалтын таһагай хүтэлбэрилэгшээр томилогдоо. 2021 оной июль һараһаа мүнөөдэр болотор Буряад Уласай Байгаалиин нөөсын ба байгаали хамгаалгын сайдай орлогшоор хүдэлжэ байгаа.