Буряад Уласай Толгойлогшо Алексей Цыденов Монгол гүрэн ошобо

Майн 2-то Буряад Уласай Толгойлогшо Монгол гүрэнэй юрэнхылэгшэ Ухнагийн Хурэлсухай урилгаар Улаан-Баатар ошобо. Алексей Цыденов Илалтын 80 жэлэй ойдо зорюулагдаһан баяр ёһололой хүлеэн абалгада байха, мүн һайндэрэй хамтын хэмжээ ябуулгануудта хабаадаха.

Һануулхада, байгша оной март һарада Алексей Цыденов Монгол гүрэн албанай хэрэгээр ошоһон байна. Тиихэдэ Улаан-Баатарай мэр Хишгээгийн Нямбаатартай уулзажа, Агууехэ Илалтын һайндэртэ зорюулагдаһан хамтын соёлой ба тамирай хэмжээ ябуулгануудые эмхидхэхэ тухай хөөрэлдөө һэн. Түсэбэй ёһоор волейболоор Кубок үнгэргэгдөө, дурасхаалай акцинууд, Зайсан Толгойдо Г. К. Жуковай хүшөөдэ баглаа сэсэгүүдые табиһан юм. “Георгиевско лентэ”, “ Илалтын вальс” гэһэн акцинууд, һургуулинуудта шэн зоригой хэшээлнүүд. Улаан-Баатар хотын музейдэ  “ Агууехэ Илалтада - сугтаа” гэһэн гэрэл зурагуудай үзэсхэлэн үшөө үнгэргэгдэхэ.

Буряад Уласай Толгойлогшо хоёр хэмжээ ябуулгада хабаадаха. Майн 3-да Россиин Эрдэм ухаанай ба соёлой түбтэ “Фронт Цэгмид” гэжэ фильм анха түрүүшынхиеэ харуулагдаха. Майн 4-дэ “Соёлын Төв Өргөө” гэжэ тоглолтын зал соо “Агууехэ Илалта – агууехэ хани барисаан” гэжэ ехэ тоглолто үнгэргэгдэхэ.