159
Буряад Уласай Толгойлогшо Алексей Цыденов Денис Гармаевые Үйлэдбэриин, худалдаа наймаанай ба хүрэнгэжүүлгын сайдаар томилбо. Урид Денис Гармаев Буряад Уласай Арадай Хуралай 7-дохи зарлалай һунгамал байгаа. Апрелиин 24-дэ үнгэргэгдэһэн уласай парламентын 7-дохи сесси дээрэ һунгамалай эрхэ найдалһаа Денис Гармаев сагһаа урид болюулагдажа, 2025 оной майн 6-һаа Буряад Уласай Үйлэдбэриин, худалдаа наймаанай ба хүрэнгэжүүлгын сайдай уялга дүүргэжэ эхилхынь түлөө һунгамалнууд дуугаа үгэбэ.
Денис Викторович Гармаев 1977 оной январиин 14-дэ Улаан-Үдэ хотодо түрэһэн юм. Тэрэ 1992-1994 онуудта Ростовой можын Новочеркасск хотодо Суворовско училищида һураа. 1998 ондо Оросой Холбоото уласай Дотоодын хэрэгүүдэй яаманай институт «юриспруденция» мэргэжэлээр дүүргэһэн байна. 1998 онһоо 2003 он болотор Эрхүү ба Улаан-Үдэ хотонуудай хуули хамгаалгын органуудта хүдэлөө. 2011 онһоо эхилжэ, 5 жэлэй туршада «Ирокс» гэжэ хизаарлагдамал үүргэтэй бүлгэмэй генеральна захиралаар ажаллаа, «Корпорация вкуса» бүлгэмэй хүтэлбэрилэгшэ, «Байкальское гостеприимство» компаниин Хүтэлбэриин түрүүлэгшэ байгаа.
2016 ондо «Улаан-Үдэ хотын байгуулагдаһаар 350 жэл» медаляар шагнагдаа. 2017 ондо Буряад Уласта аяншалгын ба эдеэ хоолой үйлэдбэрииин хүгжэлтэдэ оруулһан хубитын түлөө Засагай газарай Хүндэлэлэй грамотаар урмашуулагдаа. 2017 оной октябрь һарада Россиин эдеэ хоолой ба хүндэмүүшэ аягай «Гостеприимство» гэжэ үндэһэтэнэй шангай лауреат болоһон байна. 2023 оной сентябриин 27 болотор Улаан-Үдэ хотын һунгамалнуудай Зүблэлэй V ба VI зарлалай депутат, ниигэмэй талаар политикын Хорооной түрүүлэгшэ, Улаан-Үдэ хотын һунгамалнуудай Зүблэлэй Президиумай гэшүүн, 2025 оной апрелиин 24 болотор Буряад Уласай Арадай Хуралай 7-дохи зарлалай 15-дахи нэгэ мандатна һунгуулиин тойрогоор депутат байгаа.
Автор: Янжима ДАРМАЕВА бэлдэбэ
Фото: Буряад Уласай Засагай газарай мэдээсэлэй албан
