Холбоо харилсаагаа бэхижүүлнэ

Июниин 28-ай бимба гарагай үдэшэ Мьян­ма Уласай Гүрэнэй За­хиргаанай Зүблэлэй Түрүүлэгшэ - Мьянма Уласай Засагай газа­рай Юрэнхы сайд, аха­мад генерал Мин Аун Хлайн наһанайнгаа нүхэртэеэ болон алба­най түлөөлэгшэдтэеэ Буряад орондо мори­лоо һэн.

Айлшадай агаарай онгосоһоо буухада, заншалта хубсаһаяа үмдэһэн буряадууд, шэмээшэгүүд, хасагууд, хамнигад дабһатай хилээмээр, үндэһэн буряад сайгаар угтажа, хүндэлэлэй ехэ тэмдэг болгон, сэнхир хүхэ хадагуудые ба­рюулжа, Буряад ороной олон яһатанай соёлтой танилсуул­жа эхилээ һэн.

- Манай “РапидБио” бо­лон “Шэнэскин” нэгэдэлнүүд Мьянмын эмнэлгын эмхинүүдтэй хамтын ажал ябуулна. Худалдаа наймаанай, үйлэдбэриин, элүүрые хамгаалгын, аяншалгын, болбо­соролой һалбаринуудаар табигдаһан хамтын түсэлнүүдээр ажалаа үргэлжэлүүлнэбди.

Буряад Улас Мьянма хоёр бэе бэеһээ холо байба­шье, һүр һүлдөөрөө дүтэ: эб нүхэсэл сэгнэнэ, бэе бэеын­гээ заншалнуудые хүндэлнэ, хүгжэлтэ руу эрмэлзэнэ, - гэжэ Буряад Уласай Тол­гойлогшо Алексей Цыденов хүндэтэ айлшадаа угтаа.

Хари гүрэнүүдэй түлөөлэгшэдэй айлшалалга хам­тын ажалай шэнэ хуудаһа нээжэ, Орос гүрэнэй болон Мьянма Уласай эдэй засагуудта онсо ашаг үрэтэй бай­ха гэжэ Буряадай Засагай га­зарта батаар найдана. Хоёр үдэрэй туршада хари гүрэнэй түлөөлэгшэд олон тоото уул­залгануудые, зүбшэн хэлсэлгэнүүдые үнгэргөө, Буряад ороной соёлтой танилсаа, үйлэдбэринүүд болон Орос гүрэнэй эрдэни зэндэмэни – Байгал далайда хүрөө.

Мьянмын түлөөлэгшэд танилсалгаяа Байгал шада­рай аймагай Турка тосхон­дохи аяншалгын оршониие харалгаһаа эхилээ. Улаан-Үдэдэ айлшад Улаан-Үдын авиационно, Улаан-Үдын локомотив болон вагон заһабарилгын заводуудта хүрөө.

Мьянмын Холбооной Бүгэдэ Найрамдаха Уласай Юрэнхы сайд, ахамад гене­рал Мин Аун Хлайн хоорон­доо хамтын ажал ябуулха ту­хай уридшалһан хэлсээнүүд тухай хөөрэхэдөө:

- Эдэ үйлэдбэринүүдтэй харилсаха ехэ һонирхолтойбди. Мүн баһа болбосо­ролой болон элүүрые хамгаалгын һалбаринуудааршье. Буряад Уласай Толгой­логшо илангаяа болбосоро­лой һалбарида хамтын ажал ябуулхые маанадта дурад­хаа. Бидэ энээндэ бэлэнб­ди, - гэжэ Мин Аун Хлайн тэмдэглээд: - Буряад орондо гурбадахияа ерээд байнаб, саашадаашье ерэжэ байхаар түсэблэнхэйб, - гэжэ Юрэнхы сайд нэмэжэ хэлээ.

Буряадай «РапидБио» бо­лон «Шэнэскин» компани­нууд эмнэлгын эмхинүүдтэй бүтээлнүүдые гэршэлхэ талаар ажал ябуулна гэжэ Алек­сей Цыденов хөөрөө. Улаан-Үдын авиазаводой верто­лёдууд Мьянмада хэрэглэгдэнэ. Болбосоролой болон аяншалгын һалбаринуудта харилсаха асуудал хэлсэгдэ­жэ байна.

- Болбосоролой асууда­лаар оюутадые хоорондоо андалдаха тухай хэлсээбди. Өөһэдөө багшалха аргатай болохын тула Мьянмын оюу­тад ород хэлэ шудалха. Бидэ БГУ-да мьянма хэлэ зааха ка­федра нээжэ, энэ һалбариие хүгжөөхэбди. Хоёр гүрэнэй хүн зоной бэе бэетэеэ харил­саха аргатай болохын тула эрхэ байдал зохёожо байнаб­ди. Мүнөө хүндэтэ айлшад­таа Байгал харуулаабди. Мүн манай олон түлөөлэгшэд декабрь һарада Мьянмада ошоходоо, ехэ халуунаар уг­туулаа бэлэй. Баян түүхэтэй, һонин заншалнуудтай ехэл гоё, һайхан орон гэжэ тэмдэглэхэ байнаб. Тэндэ ошоһон хүн бүхэн дахин тии- шээ ошохо һанаатай. Гүрэнүүдэймнай хоорондо аяншалга хүгжөөхэ ямар ехэ арга боломжо бииб гэжэ ойлгонобди, - гэжэ Алексей Цыденов тэмдэглээ.

Оросой түмэр замай үйлэдбэриин арга болом­жонуудтай танилсуулһанай удаа заводой захирал Сер­гей Заборских Мьянмада зайн галай хүсөөр болон ди­зельнэ түлишөөр хүдэлдэг гибрид локомотивууд хэрэгтэй гэжэ хөөрэхэдөө:

- Манай холдинг Мьянма­тай хилэ нэгэтэй Энэдхэгтэ ажал эхилээд байна. Тэндэ 35 жэлэй хугасаада ганса шэнэ үеын локомотивуу­дые бэшэ, мүн вагонуудые бүтээжэ эхилхэ юм, тиимэһээ акционернүүд Мьянмада ажал ябуулха дуратай бай­ха гэжэ би һананаб. Хүндэтэ Юрэнхы сайд хоёрдохиёо манай заводто ерээд байна. Түрүүшынхиеэ гурбан жэлэй саана ерээ һэн. Тиихэдээ би­дэнэй яажа хубилжа байһые хараба гээшэ. Оросой түмэр замай хэмжээндэ хаана бай- һанаа дахинаа харуулбабди. Шэнэ бүтээлнүүдые, заһа- барилагдаһан шэнэ электровозуудые харуулаабди, - гэжэ Сергей Заборских һанамжануудаараа хубаал­даа.