383
2026 оной зун Буряад орондо эмхидхэгдэхэ түсэбтэй Азиин гүрэнүүдэй аймагуудай түлөөлэгшэдтэй уласхоорондын хоёр ехэ хэмжээ ябуулга үнгэргэхэ тухай тэдэ зүбшэн хэлсээ.
- Һүүлшын Ехэ Суглаанда Буряад Улас АРАССВА-гай удаадахи түрүүлэгшэ болоо һэн, тиимэһээ уласнай түрүүлэгшэ хадаа хоёр гол хэмжээ ябуулга - комиссиин суглаае ба Ниитэ Ассамблейн хуралдаае үнгэргэхэ ёһотой. Эдэ хэмжээ ябуулганууд 9 ороной 91 можо нютагые суглуулха юм. Энээнэй ашаар Буряад орон Азиин гүрэнүүдэй бусад можо нютагуудтай бүришье ехэ харилсаа холбоо үргэдхэхэ аргатай болохо, - гэжэ Лим Бён Джин ноён хэлээ.
Ерэхэ жэл АРАССВА-гай гэшүүдэй комиссиин суглаанай хэмжээндэ Буряадай аяншалгын һалбариин хүгжэлтэ тухай, мүн тиихэдэ Зүүн зүгэй эмнэлгэ дэлгэрүүлхэ талаар эмнэлгын аяншалга хүгжөөлгэ тухай хөөрэлдэхэбди гэжэ тэрэ тэмдэглээ. Гадна бүхы гүрэнүүдтэ хабаатай хүн зоной нүүлгэ, залуушуулай орон нютагһаань гаража ошолго, байгаалиие хамгаалалга гэһэн ниитэ нэгэн асуудалнууд зүбшэн хэлсэгдэхэ.
Буряадай Толгойлогшо Алексей Цыденов хэмжээ ябуулгануудые үнгэргэлгые Буряад орон өөр дээрээ даажа абаха, мүн тиихэдэ хоёр аяншалгын болон заншалта эмнэлгын дид-комиссинуудай ажалые ябуулхаар бэлэн гэжэ хэлээ.
- Дид-комиссинуудайнгаа ажаллахын талаар бэлэдхэлэй ажалай хэмжээндэ Хэнань тойрогһоо баталалгада хүртөөбди – Буряад Улас АРАССВА-гай комиссиин ажалай үүргэ дүүргэхэ гэһэн зүбшөөл абаабди. Мүн тиихэдэ Шэньси тойрогһоо албан ёһоной баталалга абаабди, тэдэнтэй хамта заншалта эмнэлгын талаар дид-комиссинуудай хүтэлбэрилэгшэд боложо, энэ ажал тус тустань ябуулхабди, - гэжэ Алексей Цыденов хэлэбэ.
Ажалаараа айлшалхадаа, Лим Джин ноён Зүүн зүгэй эмнэлгын түбтэ, мүн Буряадай промышленна паркда хүрөө. Үйлэдбэриин паркда «Шэнэскин» гэһэн зохёомол арһа бүтээлгын аргануудтай, «Ориенталь Вэй» гэһэн компанида хас эрдэнеэр уран гоё зүүдхэлнүүдые үйлэдбэритэй танилсаа. АРАССВА-гай Юрэнхы секретарь “Шэнэскинэй” технологи дээрэ үндэһэлжэ бүтээгдэһэн коллаген-ламининэй матрицые магтаа. Мүн Буряад ороной урашуул хас эрдэнеэр бодото уран бүтээлнүүдые дархалнат гэжэ тэмдэглээ.
Автор: Сэнгэ РИНЧИНОВ бэлдэбэ.
Фото: Буряад Уласай Засагай газарай мэдээсэлэй албан
