965
Тус тогтоол гаргахын урда Владимир Путин 40 минутын туршада Украинын түүхэ, мүнөөнэй байдал, ерээдүй саг тухай теле-субагаар арад зондо хандалга соогоо хэлээ. «Росси гүрэн Украинын бүрин бүтэн байхын түлөө оролдодог байгаа, теэд энэмнай дэмы байба, - гэжэ хэлээд, Гүрэнэй Дүүмэдэ болон Федерациин Зүблэлдэ тогтоол хүсэндэнь оруулха тухай хандаа. ДНР ба ЛНР Уласуудые сүлөөтэ гэжэ тоолоһоной һүүлээр Россиин Юрэнхылэгшэ хамгаалта үзүүлхэ зорилготойгоор хоёр уласай дэбисхэр руу сэрэгшэдые оруулха тухай тогтоол гаргаа. Манай сэрэгшэд арсалдаата талануудай эб найрамдалай хэлсээ баталтарнь, тэндэ байха гэжэ хэлэгдээ. Тиихэдэ Луганск болон Донецк Уласуудта Украинын талаһаа буудалганууд эхилээ, арад зониинь манай гүрэн руу ерэжэ байна. Бүхыдөө 700 мянган зон ерэхээр хараалагдана. Буряадай Толгойлогшо Алексей Цыденов Россиин МЧС-эй дарга Александр Чуприянда ДНР болон ЛНР Уласуудай 400 хүнүүдые нютагтаа байлгаха, саг зуура байрануудые олохо аргатайбди гэжэ бэшэг ябуулаа. Үшөө тиихэдэ Ростовско можын губернатортай утаһаар хөөрэлдэхэдөө, гуманитарна туһаламжа ба һайн дуратанай штабуудые эльгээхэ аргатай байһанаа Алексей Цыденов мэдүүлээ. Мүнөө Буряадай олзын хэрэг эрхилэгшэд туһа хүргэхэеэ бэлэн байһанаа дуулгаба гэжэ Буряадай Засагай газарай мэдээсэлэй албан дуулгаа.
Автор: Эрдэни РАДНАЕВ
