Буряадайнгаа түлөө харюусалга

Заншалта ёһоор, шэнэ зарла­лай 1-дэхи пленарна зүблөө тон наһатай һунгамал нээ­дэг. Россиин Ажалай Герой, Буряад Уласай Арадай Хуралай һунгамал Леонид Белых энэ удаа сессиин эхи табижа, һунгамалнуудта энгэрэй тэмдэгүүдые барюулба, һунгалтада илалта туйлаһаарнь амаршалба.

Буряадай Толгойлогшо Алексей Цыденов һунгамалнуудые амарша­лан хандаба.

- Таанадтай хамта уласай ажаһуугшадта баяр хүргэнэб. Арадай Хуралай 66 һунгамалай 37-иинь шэнэ зон. Булта бэрхэ мэргэжэлтэд, ажабайдалай дүй дүршэлтэй. Харюусалгатайгаар, үнэн зүрхэнһөө Эхэ оронойнгоо, уласайнгаа түлөө оролдон, ажа­лаа ябуулхат гэжэ мэдэнэб. Арад зонтоёо дүтэ харилсажа, туһалжа ябагты, Арадай Хуралай, уласай Засагай газарай нэгэдэмэл коман­дын бүридэлдэ ороһон бидэ сугтаа юушье бүтээхэбди, - гэжэ тэрэ тэм­дэглээ.

Арадай Хуралай һунгамалнуудые Оросой Холбоото Уласай сенатор Вячеслав Нагови­цын амаршалаа.

Арад зоной этигэл танай саа­шанхи ажалда тулга боложо үгэхэ гэжэ найданаб. Анха түрүүшынхиеэ һунгагдаһан зондо амжалта хүсэнэб. Бүхы эрдэм мэдэсэеэ, дүй дүршэлөө экономикодо болон нии­гэмдэ тохёолдодог бэрхэшээлнүүд руу шэглүүлжэ, хуули бүридхэхэ үүсхэлнүүдэй эрхэ дүүрэн хэрэглэ­хыетнай уряалнаб, - гэжэ Засагай газарай телеграмма соонь хэлэгдэ­нэ.

ХҮТЭЛБЭРИЛХЫ ТУШААЛНУУДТА

Нюусаар дуугаа үгэһэнэй дүнгөөр Буряад Уласай Арадай Хуралай 7-дохи зарлалай Түрүүлэгшээр Вла­димир Анатольевич Павлов дахяад һунгагдаба. Тэрэниие «Ниитэ нэгэн Росси» намай гэшүүд дэбжүүлһэн байна. Владимир Павловай түлөө 55 һунгамал дуугаа үгэбэ. КПРФ-эй түлөөлэгшэ Виктор Малышенкын түлөө 8 һунгамал дуугаа үгөө.

Владимир Павлов Буряадай бүхы ажаһуугшадта баяр хүргэжэ, һунгамалнуудта харюусалгата ажал­дань амжалта хүсэбэ.

Арадай Хуралай шэнэ бүридэл 7-дохи зарлалай байгууламжа элирүүлбэ. «Буряад Уласай Арадай Хурал тухай» гэһэн хуулиин 6-дахи статьягай ёһоор, Арадай Хуралай бүридэлдэ Түрүүлэгшэ, тэрэнэй хоёр орлогшонор, Арадай Хуралай Зүблэл, хороонууд болон комисси­нууд, һунгамалнуудай фракцинууд ороно. Эмхидхэлэй сесси дээрэ Татьяна Мантатова ба Баир Гармаев гэгшэд Түрүүлэгшын орлогшонорой һууринуудта дэбжүүлэгдэһэн бай­на. Татьяна Мантатовагай түлөө 62 һунгамал дуугаа үгэбэ, харин Баир Гармаевай түлөө - 61.

Дүй дүршэлтэй политик Баир Гармаев Арадай Хуралай 5 зарла­лай һунгамал мүн. Харин Татьяна Мантатовагай һунгуулиин тойрогой ажаһуугшад 3-дахияа тэрээндэ эти­гэлээ мэдүүлээ. Мэргэжэлтэ юрист Татьяна Мантатова Арадай Хуралай 6-дахи зарлалда Түрүүлэгшын орлог­шоор хүдэлөө.

Арадай Хуралай ажаябуулга хан­гаха аппарадай хүтэлбэрилэгшын һуури Жамсо Гунзынов эзэлбэ. Тэрэ­ниие 64 һунгамал дэмжээ.

ТҮРҮҮЛЭГШЭНЭР ҺУНГАГДАБА

Буряад Уласай Арадай Хуралай хороонуудай түрүүлэгшэнэр мүн лэ һунгагдаба.

Буряад Уласай Арадай Хуралай Бюджедэй, татабариин ба мүнгэн һангай талаар хороониие Александр Бардунаев толгойлбо. Буряад Уласай Арадай Хуралай Ниигэмэй бодол­гын талаар хорооной түрүүлэгшээр Игорь Марковец һунгагдаба. Буряад Уласай Арадай Хуралай Можонууд хоорондын харилсаанай, үндэһэ яһатанай асуудалнуудай, залуушуу­лай бодолгын, олониитын ба шажа­най нэгэдэлнүүдэй талаар хороониие Захааминай аймагай һунгамал Вита­лий Лыгденов хүтэлхэ юм. Семён Мат­хеев Буряад Уласай Арадай Хуралай Газарай асуудалнуудай, хүдөө ажа­хын бодолгын болон эд хэрэглэлгын дэлгүүрэй талаар хороониие толгойл­хо. Пётр Мордовской Буряад Уласай Арадай Хуралай Гүрэнэй байгуулал­тын, нютагай өөһэдын хүтэлбэриин, хуули бэхижүүлгын ба гүрэнэй албанай асуудалнуудай талаар хорооной түрүүлэгшээр һунгагдаа.

ОРЛОГШОНОР ЭЛИРҮҮЛЭГДЭЭ

Арадай Хуралай дотоодо дүримөөр, хорооной түрүүлэгшын орлогшо хорооной гэшүүд сооһоо һунгагдадаг. Тиин Буряад Уласай Арадай Хуралай Бюджедэй, тата­бариин ба мүнгэн һангай талаар хорооной түрүүлэгшын орлогшоор Михаил Степанов һунгагдаба. Вла­димир Ведерников Буряад Уласай Арадай Хуралай Газарай асуудалнуу- дай, хүдөө ажахын бодолгын болон эд хэрэглэлгын дэлгүүрэй талаар хорооной түрүүлэгшын орлогшо болобо. Буряад Уласай Арадай Хуралай Гүрэнэй байгуулалтын, нютагай өөһэдын хүтэлбэриин, хуули бэхижүүлгын ба гүрэнэй албанай асуудалнуудай талаар хорооной түрүүлэгшын орлогшоор Жамбал- Жамсо Жанаев хүдэлхэ юм. ЛДПР- эй фракциин түлөөлэгшэ Бадмадор­жо Жигжитов Буряад Уласай Арадай Хуралай Эдэй засагай бодолгын, байгаали ашаглалгын ба байгаали хамгаалгын хорооной түрүүлэгшын орлогшоор һунгагдаба. Харин Баир Цыренов Буряад Уласай Арадай Хура­лай Можонууд хоорондын харилсаа­най, үндэһэ яһатанай асуудалнуудай, залуушуулай бодолгын, олониитын ба шажанай нэгэдэлнүүдэй талаар хорооной түрүүлэгшын орлогшын һуури эзэлээ. Буряад Уласай Арадай Хуралай Ниигэмэй бодолгын талаар хорооной түрүүлэгшын орлогшоор Вячеслав Дондоков хүдэлхэ болобо.

ОРОСОЙ ХОЛБООТО УЛАСАЙ СЕНАТОР ТОМИЛОГДОО

Арадай Хуралай һунгамалнууд Александр Варфоломеевые дэм­жэбэ. Тэрэнэй түлөө 63 хүн нюусаар дуугаа үгэһэн байха юм. Тиигэжэ Александр Варфоломеев Оросой Холбоото Уласай Федерациин Зүблөөндэ 3-дахияа һунгагдаба. Гүрэн түрын хуули тогтоохо зургаан­да тэрэ Ниигэмэй бодолгын талаар хорооной Түрүүлэгшын 1-дэхи орлог­шын тушаал эзэлдэг юм.

- Буряад Уласайнгаа түлөө ехэ ажал ябуулдаг Александр Варфо­ломеевтэ дахяад этигэлээ мэдүүлэн дэмжэжэ, зүб шиидхэбэри абабат, - гэжэ Буряад Уласай Арадай Хура­лай Түрүүлэгшэ Владимир Павлов тэмдэглээ.

Арадай Хуралай абаһан тогтоол Россиин Федеральна Суглаанай Зүблөөн руу эльгээгдэхэ юм.