![](/upload/resize_cache/iblock/ce3/780_780_1/bg60f9tjck424hfclqfxpcr2rrh50gl6.png)
- Байгал далайн ариг сэбэртэ муу нүлөө үзүүлэлгые багадуулхын тулада Буряад Улас ехэ ажал ябуулна. Толгойлогшын командашье федеральна түбтэй хамта шадаха зэргээрээ бүхы хүсэл оролдолгоёо гаргана. Мүнөөдэр бидэ Улаан-Үдэһөө орожо байдаг муу һайниие сэбэрлэжэ байха мүнөө үеын бүхы технологинуудтай, технологииншье талаһаа, баһал гаргашануудай талаар яһала томо түхеэрэлгэ хараабди. Мүнөөнэй юрын бэшэ байдалда энэ түхеэрэлгэдэ мүнгэ зөөри олоһомнай һайн гээшэ. Тиигээд хэрэгсэлнүүдтэ гадаадын хорилтонуудай байбашье, экологическа талаһаань юугээрээшье дутуугүй һэлгэхэ хэрэгсэлнүүдые нүхэднай олоо, түсэблэһэн гуримаараа ажал ябуулагдана, - гэжэ юрэнхы сайдай орлогшо Виктория Абрамченко тэмдэглээ.
Сэбэрлэлгын түхеэрэлгэнүүдые һэльбэн шэнэлхэ ажалнууд федеральна «Байгал далайе хамгаалан сахиха» түлэбэй үндэһэн «Байгаали хамгаалга» түсэлөөр ябуулагдана. Һэльбэн шэнэлэлгэдэ бүхыдөө 12 млрд түхэриг гаргашалагдаха. Юрэнхы сайдай орлогшын тэмдэглэһээр, 7 млрд түхэригэй хэмжээндэ түрүүшын транш республикада оруулагдаа.
- Тон түрүүн би юу тэмдэглэхэ гэнэбиб гэхэдэ – Виктория Валерьевнада өөрынгөө баяр хүргэнэб. Олонхи хүнүүд мэдэнэгүй, Виктория Валерьевнагай элидхэлэй үндэһөөр лэ Юрэнхылэгшэ Владимир Владимирович Путинай республикын сэбэрлэлгын 21-дэхи түхеэрэлгэнүүдээр даабари үгтөө юм. Выдринэдэхи сэбэрлэлгын түрүүшын түхеэрэлгэнүүдые бидэ ашаглалгада тушаанхайбди. Эгээл ехэ сэбэрлэлгын түхеэрэлгэнүүд – эдэ Улаан-Үдэдэл ха юм даа, тиимэһээ тэдээгээр лэ ажалланабди, - гэжэ Буряадай Толгойлогшо Алексей Цыденов онсолон тэмдэглээ.
Мүнөөдэрэй талада уруудажа ерэһэн уһые механическа аргаар сэбэрлэхэ 1-дэхи пусковой комплексын оньһожоруулагдамал хэрэгсэлнүүд ашаглалгада тушаагданхай, агаараар үлеэхэ станциин байшан баригдаа, тэрэ 2-дохи пусковой комплекстой хүдэлжэ эхилхэ юм. 2019 ба 2020 онуудай хугасаада сэбэрлэлгын фильтрнүүдэй блок, хорогүй болголгын УФ блок, сэбэрлэлгын биореакторнуудай блок – эдэ бүгэдөөр сэбэрлэлгын түрүүшын хаһа дүүргэгдэжэ, хорогүй болголгые дүүргэхэ барилганууд хэгдэхэ.
2023 оной декабрь болотор биологическа сэбэрлэлгын шугамуудые барижа, ашаглалгада тушааха, уһанай тунаадаһые арилгаха түхеэрэлгэнүүдые, уһые хорогүй болголгые дүүргэхэ барилгануудые болон туһаламжын түхеэрэлгэнүүдые бариха гэжэ хараалагдана. Сэбэрлэлгын 1-дэхи шугамые хүдэлгөөд, мүнөө хүдэлжэ байһан шугам шэ- нээр баригдаһанда холбоод, тэрэнэй һуури дээрэ 2-дохи шугам барижа, 2024 оной декабрь болотор ашаглалгада тушааха гэжэ хараалагдана.
Һэльбэн шэнэдхэлгын 2-дохи пусковой комплексын 1-дэхи шатын дүнгөөр сэбэрлэлгын түхеэрэлгэнүүдэй ажалнуудай үрэ дүн – 130 мянган гурбалжан метр сүүдхэдэ сэбэрлэхэ болоо, саашадаа 2-дохи шатада 185 мянган гурбалжан метр сүүдхэдэ болгогдохо, 3-дахи оньһожоруулагдамал шугамай баригдажа дүүргэгдэхэдэ, 55 мянган гурбалжан метр сүүдхэдэ сэбэрлэжэ байха юм.
һэльбэн шэнэлэлгын барилга-хабсаралгын ажалнууд 2024 оной һүүл багаар дүүргэгдэхээр түсэблэгдэнхэй. Сэбэрлэлгын түхеэрэлгэнүүд 1984 онһоо түрүүшынхиеэ һэльбэн шэнэлэгдэхэнь гээшэ. Сэбэрлэлгын түхеэрэлгэнүүдые һэльбэн шэнэлэлгэ Байгал далай руу уруудажа ородог муу муухайн хэмжээе доошолуулжа, тэрэнэй амитадай, ургамалнуудай ажамидарха оршониие хамгаалха арга ехэ арга болоно.
Байгалай байгаали хамгаалха
Россиин Засаг газарай Түрүү- лэгшын орлогшо Виктория Абрамченко албанайнгаа хэрэгээр Буряад ороноор ябахадаа, Ой модо хамгаалгын түбэй ажал хэрэгтэй танилсаа. Энэ Федеральна гүрэнэй тэдхэмжэдэ байдаг «Россиин ой модо хамгаалгын» ба һэргээлгын ажал ябуулдаг таһаг юм. Виктория Абрамченко Байгал далайе хамгаалха түлэбэй шухалые тэмдэглээд, эдэ хэмжээ ябуулганууд саашадаашье үргэлжэлүүлэгдэхэдээ, бүхы хэмжээ ябуулганууд Россиин Засаг газарай хиналта доро үнгэргэгдэжэ байха гэжэ мэдүүлээ.
«Байгал далайе сахилга тиихэдэл дүүргэгдэхэ түлэб гэжэ хаража болохогүй гэжэ ойлгосотой. Байгал далайе сахилгын ажалнуудые 2024 он болотор ябуулаад лэ, ондоо хэмжээ ябуулгануудые хэ- хэеэ болишохогүйбди. Мүнөөдэр гүрэнэй тэдхэмжэдэ байдаг эмхидэ хүдэлдэг нүхэднай тон мүнөө үеын лабораторно түхеэрэлгэнүүдээр шэнжэлэлгэнүүдые хэнэ гэжэ бидэ хараабди. Имагтал Байгалай байгаалиин дэбисхэртэхи ой модоной өөрсэ байдалай шэнжэлгэнүүдые үнгэргэхэ. Тиигээд саашадань энэл ой модые хамгаалха аргануудые онсолжо дурадхаха. Энэ тон шухала хэрэг, тэрэ ганса экономическа ашагтай байха бэшэ, харин байгаали хамгаалгын тон ехэ үүргэтэй. Байгал далай хамгаалан сахиха саашанхи ажал тухай хэлэбэл, гүрэнэй хүгжэлтын зорилгонууд тухай Юрэнхылэгшын захиралтада 2030 он болотор манай ажаһуугшадта болбосон түхэлтэй ажабайдал болон аюулгүй оршон байдалые хангаха гэжэ баталаатай гэжэ таанад мэдэнэт, тэрэмнай байгаалияа хамгаалалтагүйгөөр бүтэхэгүй гэһэн үүсхэлтэйгөөр бидэ ажалланабди. Тиимэһээ бүхы хэмжээ ябуулгануудаа 2030 он болотор үргэлжэлүүлхэбди, - гэжэ Виктория Абрамченко тэмдэглээ.
Россиин Засаг газарай Түрүүлэгшын орлогшодо ба Буряадай Толгойлогшодо үндэһэн «Байгаали хамгаалга» гэһэн түлэбөөр ой тайга хамгаалгын мэргэжэлтэдтэ үгтэһэн тусхай техникын жэшээнүүдые харуулаа. Түлэбэй зорилгонуудые бэелүүлхын тулада, “Россиин ой модо хамгаалгын” таһаг ямаршье намаг шабар дабажа гараха техникэ: Камаз, ГАЗ, классическа УАЗ-уудые, мүн лэ вездеход худалдан абаа. Үшөө КС-701 гэһэн уһанай катертай болоо. Бүхы техникэ үргэнөөр хэрэглэгдэнэ.
«Байгал далайн байгаалиие жэнхэни зандань сахиха гэһэн үргэн ехэ түлэб - энэ үзүүлэгдэһэн гай усал усадхалгын полигонуудые барилга, ажахын хатуу үлэгдэлнүүдые усадхалга, ой модо хамгаалга, харууһалалга, сэбэрлэлгын түхеэрэлгэнүүдые һэльбэн шэнэлэлгэ, хамгаалгын далангуудые барилга. Эдэ хэмжээ ябуулганууд Ородой Холбоото Уласай Засаг газарай хиналта доро болон Виктория Валерьевнагай өөрынь дэмжэлгээр хэгдэнэ. Тэдэ Улаан-Үдэдэ, Наушкада, Хойто- Байгалай аймагта бэелүүлэгдэнэ. Тиихэдэ манай зорилго - Россиин Засаг газарай манда дамжуулан даалгажа байһан арга боломжонуудые ба нөөсэнүүдые саг соонь ашагтайгаар хэрэглэн бэелүүлгэ болоно. Манда үзүүлэгдэһэн найдалые болон туһые харюулха хэрэгтэй», - гэжэ Буряадай Толгойлогшо Алексей Цыденов тэмдэглээ.
«Байгал далайе хамгаалан сахилга» гэһэн федеральна түлэбөөр 2022 ондо Буряадай Ой модо хамгаалгын түбэй мэргэжэлтэдээр Байгалай Буряадай байгаалиин дэбисхэртэ оролсодог гурбан – Зэдын, Захааминай ба Баргажанай ойн ажахынуудтахи нэгэ сая гектар талмайда шэнжэлгэнүүд түсэблөөтэй. Энэл федеральна түлэбөөр 2022 ондо фитопатологиин 4 мянган генетическэ шэнжэлгэнүүд хэгдэхээр түсэблэгдэнхэй. Буряадай Ой модо хамгаалгын түбтэ бүхы Байгалай байгаалиин дэбисхэрһээ – ганса манай республикын ой тайгаһаа бэшэ, Үбэр Байгалайшье хизаарһаа, Эрхүү можоһоо “үбшэ хабшанһаа” гэмтэһэн модонуудай биоматериалай жэшээнүүд асарагдана. Түсэблэгдэһэн шэнжэлгэнүүдэй хахадһаа ехэнхииень “Россиин ой модо хамгаалгын” Буряадай таһагай мэргэжэлтэд хэжэ дүүргээ.
“Россиин ой модо хамгаалгын” Буряадай таһаг – энэ хамгаалдаг ой модонойгоо талмайгаар бүхы федеральна һалбариин эгээл ехэ түб. Тэрэ ой модоор бүрхөөгдэһэн ойн жасын Буряад Уласай болон Саха (Яхад) Уласай бүхыдөө 218,2 сая га (21,5 сая га – Буряад орон, 196,7 сая га – Саха орон) газарта ажалаа ябуулна. Таһагай зорилго – эдэ оронуудай ой тайга элүүрээр байлгаха. Байгша ондо Буряадай Ой модо хамгаалгын түбтэ ой тайгын уг үндэһэн нөөсэнүүдые саг үргэлжэ хаража, шалгажа байха таһаг нээгдээ юм.
Автор: Сэнгэ РИНЧИНОВ