Буряад уласай толгойлогшо - Кабанскын аймагта

Буряад ороной Толгойлогшо Алексей Цыденов Кабанскын ай­магаар ябахадаа, ниигэмэй эмхи зургаануудта хүрэжэ хараа. Ойму­ур нютагта - һургуули, Каменскда Эдиршүүлэй уран һайханай байшан шалгаа.

Оймуурай дунда һургуулида 200-гаад үхибүүд һурана, тэдэнэр дүрбэн: Дубинино, Инкино, Дула­ан ба Оймуур нютагуудһаа ерэнэ. Мүнөөдэрэй талада, һургуулиин байшан һанаһанда хүрэнэгүй, дан­шье һаа хуушараа.

- Һургуулиин байшан тон ехээр муудаһан байна. Мүнөө һургуули хорилтонуудтайгаар хүдэлнэ. Шэнэ һургуули бариха асуудал шиидхэхэ хэрэгтэй. Энэ асуудал урагшалхаб­ди, шэнэ һургуулиие барихын тула ямар нэгэн федеральна түлэбтэ ору­улхые оролдохобди, - гэжэ һургуули хараһанай удаа Алексей Цыденов тобшолоо.

Буряад ороной Толгойлогшо мүн баһа Каменскын Эдиршүүлэй уран һайханай һургуулида хүрөө. Эндэ 1000-аад үхибүүдэй уран бэлигээ мүлидэг 31 уран һайханай нэгэдэл хүдэлнэ.

2020 ондо федеральна «Үхибүүн бүхэнэй амжалта» түсэл бэелүүлгээр эхилһэн «Видео-студия» түлэбөөр хэрэгтэй хэрэгсэлнүүд худалдан аб­тагдаа. Бүхыдөө 830 мянган түхэриг гаргашалагдаа. Эдиршүүлэй бай­шанда 2022 ондо 7,1 сая түхэриг шэглүүлэгдэжэ, тэрээгээр винто­резнэ, токарна, лазерна станогууд, автогородок, майханууд, унтариин мэшээгүүд, түүдэбшын болон зүг шэг элирхэйлдэг хэрэгсэлнүүд, спутни­кова утаһан, оёдолой машинканууд, гар урлалай хэрэгсэлнүүд худалдаг­дажа абтагдаа.

АЖАҺУУГШАДТАЙ УУЛЗАЛГАҺАА

Албанай хэрэгээр Кабанскын ай­магаар ябахадаа, Буряад ороной Тол­гойлогшо аймагай ажаһуугшадтай болон олзын хэрэг эрхилэгшэдтэй хэдэн уулзалгануудые үнгэргэжэ, тэдэнэрһээ һанааень зобооһон асу­удалнуудые һуража абаа. Тэндэхи ажаһуугшадай һанаае тон ехээр харгынууд, ниитын унаа тээбэри, эмнэлгын туһаламжа, салин хүлһэн зобооно. Олзын хэрэг эрхилэгшэд бусаалтагүй тэдхэмжэнүүд, мүнгэн туһаламжанууд, аяншалгын һалбари, онгосонуудые табидаг газарнууд ту­хай асуудалнуудые табяа.

- Онгосонуудые табидаг газар­нууд тухай Юрэнхылэгшэ Влади­мир Владимирович Путинай уһан дээгүүр болон Байгал далайгаар аяншалгын даабари бии. Үшөө дээ­рэнь Байгал далайгаар онгосонууда­ар харилсаанай замай түлэб табиха тусхай ажалай бүлэг байгуулха даа­бари гаранхай. Эдэ бүгэдэ онгосо­нуудые табиха газарнуудые, сэбэр­лэлгын түхеэрэлгэнүүдые байгуулха болон онгосонуудые бүтээхэ ажал­нуудые хараална. Тиихэдээ манай ажаһуугшадта үлүү ажал болохогүй аяншалгые аюулгүйгөөр эмхидхэхэ хэрэгтэй, - гэжэ Буряад ороной Тол­гойлогшо тэмдэглээ.

Байгалай эрьедэ аяншалгын хэ­рэг хүгжөөдэг олзын хэрэг эрхи­лэгшэд олон асуудалнуудые табяа. Эдэ асуудалнууд эрье бэхижүүлгэдэ, уһаар болон зайн галаар хангалгада ба бэшэшье хэмжээ ябуулгануудта хабаатай байгаа. Тиимэһээ бүхы асу­удалнуудые тодорхойгоор хэлсэхэеэ тусхай суглаа зарлаха гэжэ шиидхэг­дээ.

Аймагай ажаһуугшадые эгээл ехэ­эр һанааень зобоодог асуудал - эм­нэлгын туһаламжа хүргэлгэ байгаа: поликлиникэнүүдэй болон ФАП- уудай ажал, тэдэниие эмшэдээр хангалга. Тиигэжэ Байгал-Худари­ин ажаһуугшадые поликлиникэ бо­лон амбулаториие ондоо байшанда зөөлгэлгэ һанааень зобооно. Тии­гэбэшье ажаһуугшадтай уулзалга­да хабаадаһан элүүрые хамгаалгын сайдай орлогшо Людмила Цыбико­вагай тайлбарилһаар, поликлини­кын байшан хойшогүй хаагдашаха бэшэ, харин заһабарилан шэнэлэл­гын үедэл саг зуура хаагдаха юм.

Мүн баһа Улаан-Үдэ Выдрино һуурин хоорондохи унаа тээбэри­ин асуудал, хотоһоо Кабанск һуурин руу хүн зониие зөөхэ унаа тээбэри­тэй эзэн олдоногүй. Буряад ороной Толгойлогшо энэ маршрут дахин байгуулха даабари үгөө. Кабанскын аймагта һаяын сагта 10 автобус үгтэхэ, нэгыень энэ замда табиха. Энэ маршрут абахаар эзэн бэлэн, гансал мүнгэн дэмжэлтын хэмжээе тоолон гаргаха үлөө.

Уулзалгын үедэ хэлсэгдэһэн бүхы асуудалнууд хиналта доро абтагдан­хай, тиигээд Засагай газар аймагай захиргаантай хамта тэдэниие шиид­хэхэ ажал ябуулха.

- Бүхы һалбаринуудаар асуудал­нууд олон. Хүнүүдэй табиһан бүхы асуудалнуудаар ажал ябуулхабди, саашадаа ааляаршье һаа, урагшаа ябахаяа оролдохобди, - гэжэ уулзал­гын дүнгүүдые Алексей Цыденов то­дорхойлоо.