Шэнэ гэрнүүд баригдахань гү?

Барилгын түсэбтэй хотын ажаһуугшадые танилсуулха, зүбшэн хэлсэхэ суглаан зар­лагдаха. Түсэлэй ёһоор Улаан-Үдын түб газарта шэнэ олон гэрнүүд, хүүгэдэй сэсэрлигүүд, һургуулинууд болон түмэр агта хүлэгөө сэргэлхэ түлбэритэ талмайнууд баригдаха.

- Гэрнүүд үмхиржэ һалажа байна. Үбэлэй хүйтэндэ дулаасуулха гээшэ амаргүй ехэ бэрхэшээл даа. Булты­ень задалжа хаяха хэрэгтэй. Ядахадаа, бидэнэй гэрнүүдые ямаршье ЖЭУ абанагүй. Иигээд лэ олон жэлэй турша­да бэрхэшээлнүүдээ өөһэдөө шиидхэнэбди, - гэжэ хотын «зүрхэндэ» ажаһуудаг эрхэтэн хэлэнэ.

Хэдэн зуугаад жэлэй саада тээ баригдаһан модон гэрнүүдэй хажууда шулуугаар баригдаһан 2 дабхар байшангууд зэргэлнэ.

- Эндэ байхада, намда зохид. Сталин багшын үедэ баригдаһан гэрнүүд уужам, үндэр юм. Үшөө тиихэдэ хотын тэг дунда байна гэ­эшэбди, - гэжэ нүгөө ажаһуугшань хэлэнэ.

Түрүүшын халаанда Смолиной нэрэмжэтэ болон Набережная гудамжануудтахи гэрнүүдые задалжа эхилхэ юм байна.

- Хүгжөөлгын түсэлдэ ороһон газарнуудаа тэмдэглэхэ хэрэг­тэй. Ямар гэрнүүд энэ аргаар усадхагдахаб, алиниинь үлэхэб гэжэ элирүүлэгдэхэ болоно. Тиимэ шиидхэбэри абахын тула ажаһуугшад өөһэдөө суглаанда ерэжэ, дуугаа үгэхэ болоно, - гэжэ Бу­ряад Уластахи газар дэбисхэрэй хүгжөөлгын хүтэлбэриин дарга Зана Тумуров хэлэнэ.

Гэр байрануудай эзэдэй ехэнхи хубинь энэ үүсхэл дэм­жээ һаань, задалжа орондонь шэнэ гэр баригдаха.