Эмнэлгын колледжын шэнэ байшан

- Буряадай ажаһуугшадай элүүрые хамгаалха мэргэжэлтэдые бэлдэхэ үшөө нэгэ арга боломжо манда үгтэбэ. Үхибүүдые, наһатай зониие, бидэниие аргалха бэрхэ, зөөлэн сэдь­хэлтэй мэргэжэлтэд энэ байшанда саашадаа бэлдэгдэхэ гэжэ найданаб, - гэжэ тэрэ хэлэбэ.

Гадна Буряадай Толгойлогшын тэмдэглэһээр, һүүлэй хэдэн жэлнүүдтэ эмнэлгын колледждо һураха оюута­дай тоо 1300 хүрэтэр дээшэлүүлэгдээ. Дунда шатын эмшэдээр дүүрэн хан­гаха гэһэн Оросой Холбоото Уласай Юрэнхылэгшэ Владимира Путинай даабариин шугамаар хэмжээнүүд бэелүүлэгдэнэ. Гадна Э.Р. Раднаевай нэрэмжэтэ Эмнэлгын колледждо 200 хүн доодо шатын эмшэдые бэлдэхэ программаар һуража гарана, мүн 2 мянга гаран дунда шатын эмшэд мэргэжэлээ дээшэлүүлнэ.

Колледжын хуушан байшанай һуралсалай эрилтэдэ таарахаяа болиһон ушарһаа Буряадай Заса­гай газар Ботаническа үйлсэдэ оршодог 1 447 дүрбэлжэн метрэй талмайтай байшан худалдажа абаһан байна. Заһабарилга хэхэ, эд бараа, оньһото хэрэгсэлнүүдые абаха мүнгэн зөөри мүн лэ һомолоо.

- Мүнөөдэр манай колледжын түүхэдэ шухала удха шанартай үдэр боложо байна. Һүүлшын 60 жэл соо анха түрүүшынхиеэ шэнэ байшантай болобобди. Нэн түрүүн оюутадаа амаршалнаб. Таарамжа­тай зохид эрхэ нүхэсэлдэ һураха болоһондотнай баярланаб. Сэдь­хэлэй гүнһөө багшанарые амар­шалнаб, шэнэ байшантай болохо хүсэлнай бэелүүлэгдэбэ. Коллед­жын хүтэлбэри болон багшанар оюутадайнгаа һуралсалай шанар улам дээшэлүүлхын тула оролдо­хобди, - гэжэ колледжын захирал Светлана Замбалова мэдүүлбэ.

Шэнэ байшан соо нэгэ халаанда 250 оюутад һураха. Эндэ хирургиин, түргэн туһаламжын, нарайлалгын, эм найруулгын болон бэе махабад һэргээлгын таһалганууд зохёогдоо.