Уран гуурһаараа уладаа үргэжэ...

Аяар 26 жэлэй саана, 1997 оной октябриин 9-һөө эхиеэ абаһан энэ урилдаан хорёод жэл­дэ таһалгаряагүй үндэһэн сониной хуудаһанууд дээрэ эмхидхэгдэжэ байһанаа, хорото хамшагай дэлгэрһэн ушараар һүүлэй 3 жэлдэ үнгэрөөгүй. Тиимэһээ уншагшаднай, хүдөө бэ­шэгшэднай энэ конкурс хүлеэшэнхэй хонходожо, хэзээ соносхохотнайб гэжэ дайлажа мэдээ. Энэ хадаа тус урилдаа­най уладай дунда эрилтэтэйе гэршэл­нэ. Буряадаймнай гол баялиг – хүнүүд лэ ха юм. Уласай элдэб һалбарида ажал ябуулжа, үдэр бүриингөө байда­лаар олондо жэшээ харуулжа байһан хүнүүд тухай зураглалнуудаар уншаг­шаднай һонирхоно гэжэ ойлгонобди. Эды олон жэлдэ гурба мянга гаран хүн тухай очеркнууд хэблэгдээ. Тэдэ­нэй дунда элитэ эрдэмтэд, жэшээнь, түүхын эрдэмэй доктор, Петровско академиин бодото гэшүүн, Монголой академиин бодото гэшүүн Шираб Чи­митдоржиев, хэлэ бэшэгэй эрдэмэй доктор, профессор Улзы-Жаргал Дон­дуков, МАН-ай академик Валентина Найдакова, физико-математическа эрдэмэй доктор Гунга-Нимбу Данда­рон, арадай уран зохёолшод Лопсон Тапхаев, Матвей Чойбонов, Гунга Чи­митов, Дулгар Доржиева, Монголой болон Буряадай оперын ехэ дуушад Жаргалсайхан, Елена Шараева, Рос­сиин арадай артист Виктор Ганженко, мэдээжэ артистнууд Владимир Кон­дратьев, Дамба-Дугар Бочиктоев, Ми­хаил Елбонов, Лариса Егорова, алдар суута диктор Батор Цыбенов, эстра­дын мэдээжэ дуушад Эрдэни Батсух, Чингис Раднаев, Булат Бадмаев болон бусад.

Гэбэшье олондо мэдээжэ бэшэ­шье һаа, нютагаархидтаа, дүтынгөө зондо бодото жэшээ боложо ябадаг хэды олон хүнүүд тухай зураглалнууд бэшэгдээ гээшэб! Эндэ журналист­нуудай, хүдөө бэшэгшэдэй аша орол­долго тэмдэглэхэ шухала. Ганса байг­ша ондо аяар 36 бэшэгшэд 56 очерк дурадхаһан байна. Тэдэндээ халуун баяраа мэдүүлнэбди! Үглөөдэр боло­хо хүндэлэлэй ёһололдомнай оролсыт гэжэ уншагшадаа уринабди!