«Дундаршагүй бэлигэй толон»

Цыденова Толона Эрдэмовна 2005 оной жабартай хүйтэн үбэл алтан дэлхэй дээрэ мүндэлжэ, модохон Харгана угтай айлай хоёрдохи үри болоо. Түшэхэ Эрдэм Гармаевич эсэгэтэй, энхэрхэ Сэсэгма Гуробазаровна эхэтэй, ур­даа хараха Сэндэмэ эгэшэтэй, хой­ноо дахуулха Цыдып дүү хүбүүтэй, эрхэлүүлхэ хүгшэн аба эжытэй, нэн­гэн няалдаха нагаса аба эжытэй - дүүрэн тэгшэ жаргалтай басаган лэ даа.

Толона балшар бага наhанhаа дуулаха, хатарха, зураха дуратай, хажуугаарнь чанза, синтезатор дээрэ наададаг ехэ хурса, hүбэлгэн, аза талаантай басаган. Дунда классуудта hуража ябахадаа, шүлэгшье зохёожо эхилээ. Нэгэтэ Багшын hайндэрэй үдэртэ намда Толона шүлэг зохёожо бэлэглээ гэжэ ород хэлэнэй багша Оюна Жимбеевна уяран хѳѳрэжэ байгаа hэн, үшѳѳ тиихэдэ Александр Островскиин герой Катеринын монолог удха шанартайгаар, ѳѳрын маягтайгаар хѳѳрэhыень магтаа бэлэй.

Толона 7-8-дахи классhаа эхилжэ, элдэб янзын мүрысѳѳнүүдтэ: олим­пиадануудта, эрдэм шэнжэлэлгын хуралдаануудта биологёор, техно­логёор, ород хэлэ ба литератураар, нютаг нугаяа шэнжэлэлгын талаар эдэбхитэйгээр хабаадажа, түрүү hууринуудые оло дахин эзэлээ, түрэл hургуулияа суурхуулаа.

Буддын шажантанай заншалта Сангхын дурадхалаар эмхидхэгдэдэг «Эхэ хэлэн - манай баялиг» гэhэн мүрысѳѳндэ hургуулиингаа бэшэ шабинартай хамта эдэбхитэйгээр хабаадалсажа, түрэл хэлэеэ нилээд мүлеэ.

11-дэхи ангиин байхадаа, айма­гай «Баатар, Дангина-2022» гэhэн мүрысѳѳндэ хабаадажа, Гран-при абажа, гэртэхинээ, түрэлхидѳѳ, нютаг зоноо баярлуулаа.

Мүнѳѳ үедэ хүршэ орон ошожо, Монголой үндэhэн ехэ hургуулида оронхой, хитад хэлэнэй оршуулаг­шын факультедтэ hуража байна.

Толона басаганда энэл зандаа hайхан hанаатай, сэбэр сэдьхэлтэй, налгай жаргалтай, наада зугаатай ябыш даа гэжэ хүсэнэб. Бэлиг шада­баришни үшѳѳл дээшээ hалбараг!