Үндэһэн хатараа харуулжа, үндэр шанда хүртөө

Энэ ехэ хэмжээнэй урилдаан­да Түнхэнэй аймагай Арша­ан һууринай «Подснежники» гэһэн бүлгэм эрхимээр хабаадажа ерэбэ. Москва хото ошохынгоо урда тээ тус хатарай бүлгэмэй гэшүүд ехэл бэлэдхэл хээ. Хамагһаа түрүүн тэдэ­нэр шэнэ хатарнуудта һураа. Тиигэжэ тэдэнэр Сергей Мельников гэһэн ха­тарай мэдээжэ багшатай интернедэй аргаар харилсаа тогтоожо, һуралсал гараа. Шэнэ хатарай зүжэгүүдые, этю­дые үзэжэ, тэдэнэйнгээ онсо маягые ойлгожо, хатарнуудые гүйсэдхэһэн байна.

«Энэ ехэ һуралсал интернедэй аргаар гарахада, яһала хүндэ байгаа, тиибэ яабашье манай эдир хатаршад урдаа табиһан зорилгоёо хүсэд дүүргэжэ, намтайгаа хамта ехэхэн дүршэл абаа»,- гэжэ «Подснежники» бүлгэмэй хүтэлбэрилэгшэ, нэмэлтэ һуралсалай багша Мария Закамельская онсо тэмдэглэнэ.

Дүрбэн үдэрэй туршада Баш­кортостан, Саха (Яхад), Дагестан, Донецкэ Арадай Уласуудай, Тулын, Новогородой, Кемеровын, Сахали­най можонуудай, Краснодарай, Үбэр Байгалай хизаарнуудай, Тюмень, Челябинск, Рязань, Санкт-Петербург, Екатеринбург, Новосибирск хотонуу- дай бүхыдөө 140-өөд бүлгэм болон 4500 мянган гүйсэдхэгшэд сугларжа, өөһэдынгөө бэлиг талааниие харуу­лаа.

«Космос» гэһэн баяр ёһололой танхим соо болоһон мүрысөөнэй гол программада манай хатаршад Буряадайнгаа эгээл мэдээжэ ёохор хатарые олоной һонорто дурадха­жа, элитэ хатаршан Сергей Мельни­ковэй һургаһан хамаг онол аргануу- дые дүүрэн хэрэглэжэ, ялас гэмээр бэлигээ харуулаа. Тиигэжэ жюриин, мүн сугларһан түмэн зоной дура буляахал ёһоороо буляагаа.

«Щелкунчик» гэһэн үндэһэтэнэй телевизионно шангай хамтын дүнгүүдэр «Подснежники» бүлгэм «Һажаажа найруулһан» гэһэн номи­нациин 1-дэхи һууриин лауреадай диплом абажа, түрэл нютагаа, нарата һайхан Буряад ороноо суурхуулжа ерээ.

Үндэһэтэнэй «Щелкунчик» гэһэн телевизионно шан Москвагай уласхоорондын хатарай академи үнгэргэдэг юм.