Эршэтэй хүгжэлтэ хэрэгтэй

Буряад Уласай Толгойлог­шын дэргэдэхи Аха захатанай зүблэлэй гэшүүн, Ородой Хол­боото Уласай арадай артист, Бүгэдэ Буряадай үндэһэн соёлой эблэлые 2006 ондо толгойлһон Доржи Суль­тимовта буряад арадай гол ниитэ эм­хиин ээлжээтэ VII хурал нээхэ хүндэтэ үүргэ даалгагдаһан байна. Буряад Уласай Толгойлогшо Алексей Цы­денов, Буряад Уласай Арадай Хура­лай Түрүүлэгшэ Владимир Павлов, Буддын шажанай заншалта Сангхын дид-хамба лама Дагба Очиров, Эрхүү можын засаг даргын орлогшо – Усть- Ордын Буряадай тойрогой Захиргаа­най хүтэлбэрилэгшэ Анатолий Про­копьев, Агын Буряадай тойрогой За­хиргаанай хүтэлбэрилэгшэ Билигма Будаева, Монгол Уласай Буряад соёл ба ёһо заншал хүгжөөлгын жасын юрэнхылэгшэ Соёлсүрэнгийн Билег­сайхан, Хитад Арадай Уласай Буряа­дай соёлой түбэй захирал Цэрэнда­ши хүндэтэ айлшадай тоодо орожо, амаршалгын үгэнүүдые хэлээ.

Буряад Уласай Толгойлогшо үгэ абахадаа, мүнѳѳ орёо саг тулажа ерээд байна гээд, онсо тэмдэглээ: «Иимэ сагта буряад арад ѳѳрынгѳѳ хүсэ шадал бодотоор харуулжа бай­на. Хүбүүднай Эхэ ороноо эрэлхэгээр хамгаалжа, буряад баатарай жэшээ харуулна. Тиихэдэ буряад соёлшье олондо мэдээжэ болоно. Yндэhэн эдеэнэй Бүхэроссиин мүрысѳѳндэ буузамнай түрүүлээ. Бүхэроссиин үндэhэ яhатануудай артистнуудай мүрысѳѳндэ Чингис Раднаев мүн лэ онсо шалгараа… Омогорхомоор юумэн олон».

Гэбэшье буряад хэлэнэй байдал бултанай hанаа зобооно гээд, Буряад Уласай Арадай Хуралай Түрүүлэгшэ мүнѳѳдэрэй гол бэрхэшээл дээрэ тогтоо. «Буряад Уласай Толгойлог­шын баталhан буряад хэлэ сахин хүгжѳѳлгын программын хэмжээн соо энэ бэрхэшээл шиидхэхэ талаар ажал ябуулагдана. Мүнѳѳ дээрээ 80 сая түхэриг энэ хэрэгтэ hомологдоно. Теэд хүлеэгдэhэн дүн харанагүйбди. Юундэ гэртэхин, хүгшэн эжы абанар үхибүүдтээ, аша зээнэртээ буряад хэлээ дамжуулнагүйб? Ѳѳhэдѳѳ түрэл хэлээ мэдэнэ ха юм. Yхибүүн түрэхэhѳѳ хоёр хэлэн дээрэ дууга­раад, хэлэндэ орохо ёhотой. Буряад хэлээ алдажа байhан сагта буряад соёл хүгжэхэгүй», - гэжэ Владимир Павловай хэлэхэдэ, делегадууд альгаа ташан, зүбшѳѳжэ байhанаа мэдүүлээ.

Бүгэдэ Буряадай үндэhэн эблэлэй энэ хуралай дүнгѳѳр Бүгэдэ Буряа­дай үндэhэн эблэлэй Зүблэл шэнээр бүридхэгдэжэ, юрэнхылэгшѳѳр Улаан-Yдын Һунгамалнуудай зүблэлэй Түрүүлэгшэ Чимит Баль­жинимаев hунгагдаа. Нэгэдэхи дид-юрэнхылэгшөөр уласай «Бэлиг» түбэй захирал Баир Балданов томи­логдоо.