Бодотоор ажал хэхэ – гол зорилго

Чимит Валерьевич шэнээр бүридүүлэгдэһэн ВАРК-ын байгуулгатай нэн түрүүн та­нилсуулаа. Президиумэй бүридэлдэ 7 хүн, Зүблэлэй бүридэлдэ 31 хүн, Хиналта-шалгалтын комиссиин бүридэлдэ 3 хүн орохо юм ха. Коор­динационно зүблэлэй бүридэлдэ орохыень регионуудай толгойлог­шонорто дурадхагдаха.

Буряад Улас Үбэр Байгалай хизаар хоёр хоорондо холбоотой­гоор ажалаа ябуулха тухай хэлсээн баталаатай һаа, Эрхүү можотой хэл­сээн (соглашение) баталаатай бэшэ байна. Энэ талаар хүдэлхэ хэрэгтэй. Теэдшье хэхэ ажал олон. Тэрэнь мүнөө дээрээ гол түлэб эмхидхэлэй ажалтай хабаатай. Һаяын сагта ВАРК-ын байрлаха газар эли болохо. Буряад арадай үндэһэн соёлтой хабаатай асуудалнуудтай, дурадхал­нуудтай хайшаа ошожо хандаха тодо газартай нэн түрүүн болоодхихо хэрэгтэй. Удаань гүйсэдхэхы хороон байгуулагдаха. Бүхы ажаябуулгаяа гуримшуулхабди гээд, ВАРК-ын юрэнхылэгшын үгэнүүдһээ ойлгохо­ор байба.

«Зүблэлэй бүридэлдэ орохо хүсэлтэй зон хандана. Юрэ нэрэ зүүгээд ябахын түлөө бэшэ, бодотоор ажал ябуулха гэбэл, ерыт, орыт! – гээд, Чимит Валерьевич уряална. Буряад хэлэ, үндэһэн спорт хүгжөөлгын тала­ар нютагай эблэлнүүдэй Зүблэлнүүд ВАРК-ын дэргэдэ байгуулагдаха юм.

Буряадаар видео-ролигууд дахи­наа буулгагдажа эхилхэ. Буряад хэлэн­дэ хабаатай һүүлэй бүхы туйлалтануу­дые нэгэ газарта харамаар интернет- талмай байгуулагдаха, ВАРК-ын сайт, ниитын сүлжээнүүдтэ хуудаһанууд зохёон байгуулагдахаар түсэблэгдэнэ. Бүгэдэ Буряадай үндэһэн соёлой эблэлэй эхин дээрэ байһан элитэ зоной нэрэ мүнхэрүүлгын талааршье ажал ябуулагдаха.

«Буряад хэлэнэй видео- хэшээлнүүдые буулгаха талаар хүсэл бии. Гүрэнэй хоёр хэлэ мэдэдэг IT-мэргэжэлтэд дуталдана», - гээд, Баяр Дашеевич мэдүүлбэ.

«Минии гол үүргэ – ВАРК-ын ажал гуримшуулха. Зүбөөр ажая­буулга байгуулжархёо һаа, саашаа ажал ябуулагдажа байха. Тиигэхын түлөө хэлэ, соёл гүнзэгыгөөр мэдэхэ хэрэгтэй бэшэ – дээдэ һургуулитай мэргэжэлтэд байна ха юм. Ажал байгуулаад, хүн зоноор хэлсэжэ, мүнгэ алта олохо – юрэнхылэгшын гол ажал гэжэ ойлгоноб. Би ниитын эмхинүүдтэ хүдэлһэмби. Ямар ажал хүлеэнэб гэжэ ойлгоноб», - гээд, Чимит Бальжинимаев тэмдэглэбэ.

Буряадай соёл урлалай агууехэ түлөөлэгшэдэй байгуулһан Бүгэдэ Буряадай үндэһэн эблэлэй шэнэ бүридэл бодотоор ажалаа ябуулжа, үндэһэн хэлээ, ёһо заншалаа сахин хамгаалха хэрэгтэ горитой хубитаяа оруулха гээд найдая.