Үхибүүдтэ – «бэлэг»

 Россиин Юрэнхылэгшын үүсхэһэн Гэр бүлын жэл­дэ энэ үйлэ хэрэг зо­рюулагдаа. Буряадай Тол­гойлогшо Алексей Цы­денов шэнэ байша­най һүлдэтэ тэмдэг болоһон түлхюур үхибүүдтэ, сэсэрлигэй ажалшадта барюулба.

Үхибүүдэй сэсэрлигые даагша Дарима Цыденовагай хэлэһээр, шэнэ байшан жэлһээ үлүүхэн сагай туршада бодхоогдоо:

– Бидэ барилгын дүүрэхые хүлеэжэ ядан байга­абди. Албан ёһоной баримта бэшэгтэй болоһоной удаа Посели һууринай үхибүүдые абажа эхилхэб­ди. Эндэ 3-7 наһанай хүүгэдэй 10 бүлэг нээгдэхэ. 50 гаран мэргэжэлтэд хүдэлхэ. Сэсэрлигтэ үхибүүдые аргагүй хүлеэнэбди.

Сэсэрлигэй 2 дабхар байшан дотор үхибүүдэй наадаха томо таһаг, хүгжэмэй ба тамирай залнууд, эмнэлгын таһаг, эдеэ бэлдэхэ ба угаабариин газар бии.

Барилгада федеральна ба Буряад Уласай бюджедүүдһээ дүн хамтадаа 397,89 сая түхэриг шэглүүлэгдээ. Буряадай гүрэнэй «Болбосорол хүгжөөлгэ» гэһэн программын шугамаар шэнэ сэсэрлиг бодхоогдобо. 2023 ондо энэл програм­мын шугамаар Ивалгын аймагай Иволгинск, Доодо Ивалга, Сот­никово һууринуудта хүүгэдэй сэсэрлигүүд баригдаһан байна.