Эхэнэрнүүдэй үүргэ ехэ

Мартын 11-дэ Улаан-Үдэдэ Г.Ц. Цыдынжаповай нэрэмжэтэ Буряадай гүрэнэй акаде­мическэ Оперо болон баледэй теа­трай байшан соо үнгэргэгдэһэн ху­ралдаан дээрэ Буряад Уласай Тол­гойлогшо Алексей Цыденов хабаа­дагшадые мэндэшэлэн амаршалба.

- Гүрэн түрэ дотор бүхы юумэн ажаһуугшадай хамтын хүсөөр бүтэнэ. Энээниие ганса эрэшүүл гү, али ганса эхэнэрнүүд хэнэ гэжэ илгахын аргагүй. Мүнөөдэр Буряад Уласай Засагай газарта экономикын ба нии­гэмэй харюусалгатай һалбаринуудые эхэнэрнүүд даажа ябана. Барилгын һалбаридашье, хүтэлбэрилхы туша­алнуудташье тэдэ хүдэлнэ. Гэхэтэй хамта гэр бүлын уялганууд эхэнэрэй ээм дээрэ. Таанад - манай түшэг тулга, хүсэ шадал болонот. Бидэ, эрэшүүл, таанадаа дэмжэхэбди, - гэжэ Алексей Цыденов хэлэбэ.

- Һүүлэй 2 жэлэй туршада бидэ бүри эдэбхитэйгээр буян үйлэдэнэбди. Эхэнэрнүүдэй ба һанаагаа зобоһон зоной хамтын оролдолгоор сэрэгэй тусхай операцида хабаадагшадта 50 тонно эд бараа суглуулаабди. Сэрэгшэдтэ далдалан нюулгын гүльмэнүүдые, хубсаһа, эдеэ хоол, шэнэ жэлэй бэлэгүүдые, үхибүүдэй ба оюутадай бэшэгүүдые, эмнэлгын газарнууд руу эмүүдые, дулаан хүнжэлнүүдые эльгээгээбди. Энэ хэрэгээ үргэлжэлүүлһээрбди,- гэжэ «Буряадай эхэнэрнүүд» эмхиин хүтэлбэрилэгшэ Анна Скосырская тэмдэглээ.

«Үдэрэй туршада хотын элдэб талмайнуудта арсалдаата асуудал хэдэн талаһаань зүбшэн хэлсэһэн хэмжээ ябуулганууд үнгэргэгдөө. Ниитын болон һайн дуратанай, олзын хэрэг эрхилэгшэдэй эмхинүүдэй хүтэлбэрилэгшэд эндэ хабаадаа. Эхэнэрнүүдэй арга боломжонууд ба бэрхэшээлнүүд, эхын эрхэ ба багашуулые дэмжэлгэ, гэр бүлын институт, Эхэ орондоо дурлал - хуралдаанай гол сэдэбүүд болоо.

Улаан-Үдэ хотын захиргаанда үнгэргэгдэһэн хэмжээ ябуулгада хабаадагшад гэр бүлын, хүн зоной тоо бүридэлэй асуудалнууд дээрэ тогтоо. Буряад Уласай Арадай Хурал­да «Элүүр энхэ эхэнэр - элүүр энхэ ерээдүй» гэжэ нэрлэгдэһэн талмай эмхидхэгдээ. Үндэһэтэнэй номой санда элдэб яһатан хоорондын ба гэр бүлын харилсаанда, ёһо зан­шалда зорюулагдаһан сэдэбүүдээр зүбшэн хэлсэлгэ болоо. Харин Буря­ад Уласай Засагай газарта ургажа ябаа үетэниие Эхэ орондоо дуратай­гаар хүмүүжүүлхэ талаар хөөрэлдөөн үнгэргэгдэбэ.

Нэмэжэ хэлэхэдэ, мартын 12-то Владивосток хотодо «Шухала юумэн тухай ехэшүүлэй хөөрэлдөөн: эхэнэ­рэй хараса» гэжэ хуралдаан болоо. Алас Дурна зүгэй можо хизаарну­удай 400 гаран түлөөлэгшэд эндэ хабаадаа. Буряад Уласай Хүн зониие ниигэмэй талаар хамгаалгын яама­най мэргэжэлтэд Буряад ороноо хуралдаанда түлөөлөө. Алас Дурнада тушаалаар амжалтатай дэбжэлгын арга боломжонууд, хуули баталан абалгада, ниигэмэй ба экономическа хүгжэлтэдэ эхэнэрэй үүргэ гэхэ мэтэ шухала асуудалнууд дээрэ хабаадаг­шад тогтоо.

Радиогой ба телевидениин хүтэлэн ябуулагша, сэдхүүлшэ Юлия Барановская, «Росси мүнөөдэр» гэжэ мэдээсэлэй агентствын гүйсэдхэхы захирал, Юрэнхылэгшын дэргэдэ эрхэтэдэй ниигэм ба хүнэй эрхэ хүгжөөлгын Зүблөөнэй гэшүүн Кирилл Вышинский, Оросой Холбо­ото Уласай сенатор Дарья Лантрато­ва, сэрэгэй тусхай операциин баа­тарнууд болон бусад хуралдаанда оролсоо.