Эдиршүүлэй эрмэлзэл

Эндэ һаяхана эдиршүүлэй дун­да үреэлнүүдэй мүрысөөн үнгэргэгдөө. «Манай сэсэрли­гэй үхибүүд элдэб мүрысөөн, харал­гануудта ехэ дуратайгаар хабаада­даг. «Гуламта», «Бамбарууша» гэһэн конкурснуудта амжалта туйладаг­бди. Мүнөө дээрээ саадта 18 үхибүүн ябадаг», - гээд, сэсэрлигые даагша Санжидма Эрдынеева хөөрэнэ.

Буряад Уласай габьяата һорин хүмүүжүүлэгшэ Олег Цыдыпов: «Энэ сэсэрлигтэ манай зээ басаган ябадаг. Иимэ хэмжээ ябуулганууд ехэ хэрэгтэй. Ургажа ябаа улаан бургааһадай түрэл хэлэн дээрээ үреэлэй һайхан үгэнүүдые хэлэжэ байхада, сэдьхэлдэ сэсэг һалбарна. Бидэн гэртээ зээ басагантаяа буряа­даараал хөөрэлдэхэ гэжэ оролдодог­бди. Гэбэшье мүнөөнэй оршон сагта телевизор, интернедэй нүлөө ехэ. Хамагһаа түрүүн гэртээл хүүгэдээрээ буряад хэлэн дээрээ хөөрэлдэхэ ёһотойбди».

Үхибүүн бүхэн сугларагшадай урда гаража, үреэлнүүдые уран гоёор хөөрөө. «Хошуун-Үзүүр» гэһэн хүдөөгэй байгууламжын захиргаа­най мэргэжэлтэд, региональна «Бай­гал далайе хамгаалагшад» гэһэн ниитэ хүдэлөөнэй хүтэлбэрилэгшэ, бизнес-тренер Дулма Содномова болон бусад эдиршүүлые амарша­лаа, һайн һайханиие хүсөө.

Мухар-Шэбэрэй аймагай залуу­шуулай эблэлэй түрүүлэгшэ, олзын хэрэг эрхилэгшэ Даши Гомбожапов аймаг соогоо боложо байдаг хэм­жээ ябуулгануудые али болохоор дэмжэдэг. «Хүн болохо багаһаа, хүлэг болохо унаганһаа» гэһэн арадаймнай сэсэн үгэнүүдэй ёһоор хүн гээшэ бага балшар наһанһаа түрэл арадайнгаа баялигые сэгнэхэ сэдьхэлтэй ургаха ёһотой. Мүнөө эдиршүүлэй буряад хэлэн дээрээ үреэлнүүдые хэлэжэ байхадань, үнэн зүрхэнһөө баярлааб, урма­шааб», - гээд, Даши Элбэкбаиро­вич хэлэбэ. Тэрэ үхибүүн бүхэндэ бэлэгүүдые барюулаа.