Эдир наһанһаа эдэбхитэйнүүд

Ой хамгаалгын ажалда тепловизор тон хэрэгтэй. Тэрэнэй ашаар түргэн дары ойн түймэр элирүүлхэдэ бэ­лэн байдаг. Тиихэдэ энэ техникэ модоной хүнды соо унтаржа ядаhан гал мүн лэ тор­фын шатажа байhые обёорхо аргатай юм. Энээн тухай эдир ой тайга хамгаалагшадта дүй дүршэлтэй мэргэжэлтэд хөөрэжэ, ойл­гуулжа үгэнэ.

- Ехэ hонин мэдээсэлтэй танилсаабди. Энэ эрдэм манай ажалда тон туhатай, - гэжэ Ангоя һууринай дунда hургуулиин шаби Алина Романова хэлэнэ.

Иимэ хэшээлнүүдтэ ойн түймэр яагаад унтараахаб гэжэ үхибүүд һайнаар мэдэхэ болоно. Мүн лэ тэдэнэртэ hэргылэмжын ажал тухай мэдээсэгдэнэ. «Иимэ ажал ябуулһанай ашаар зарим шабинар сааша­даа ойн ажахыда хүдэлхэ хүсэлтэй болоно», - гэжэ Ангоя һууринай ойн ажахын дарга Виктор Шарпов хэлэнэ.

Шабинар ойн ажахын тусхай хубсаhаар хангагданхайнууд. Үхибүүд ёһотой түймэр унтараалгада хабааданагүй ааб даа. Харин hэргылэмжын ажалда, залуу модохонуудые тарилгада эдэбхитэйгээр туhална. Ургажа ябаа үетэнэй ажал уласай байгаали хамга­алгын слёдто үндэрөөр сэгнэгдээ.

- Бидэнэр түрүүшын hуури эзэлээ hэмди. Энэмнай харюусалгатай хэрэг, тиимэhээ бидэнэр бүри hайнаар оролдожо ажалаа ябуулхабди, - гэжэ «Кедр» гэhэн hургуулиин ойн ажахын хүтэлбэрилэгшэ Татьяна Шуто­ва хэлэбэ.

Мүнөө эдирхэн эдэбхитэд хабарай ажалда бэлдэжэ сүлөөгүй.