Хамтын хэрэг хүсэтэй

 Һайн дуратанай эдэбхи үүсхэл

Волонтёрнууд интернедэй арга боломжо хэрэглэжэ, вайбер, телеграмм гэһэн сүүлжээнүүдтэ өөһэдынгөө бүлгэмүүдые бии болгоо. Тиигэжэ тэдэнэр үдэр бүри шахуу бэе бэетэйгээ харилсажа, дүй дүршэлөөрөө хубаалдана.

- Захааминай, Кабанскын, Бар­гажанай, Ивалгын, Хэжэнгын, Ахын, Хориин болон бусад аймагуудта хүн зон буянтай энэ үйлэ хэрэгтэ тон эдэбхитэйгээр хабаадана, - гээд, энэ хүдэлөөнэй эдэбхитэн Очирма Нор­боева хөөрэнэ.

Ивалгын дасанай дэргэдэхи цехтэ элдэгдэһэн хониной нооһон Захааминай аймагай Михайловка һуурин эльгээгдэдэг. Тэндэхи һайн дуратан сэрэгшэдтэ дулаахан бүһэ, трансформер болон бусад хэрэгтэй зүйлнүүдые оёно. Һайн дуратанай оролдолгоор ниислэл Улаан-Үдэ хотодошье энэ ажал урагшатайгаар ябуулагдана. Жэшээнь, Борсоевой гудамжаар оршодог 31-дэхи байшан­да, Зүүн Сибириин гүрэнэй техно­логиин ба хүтэлбэриин универси­тедэй, Михей Ербановай нэрэмжэтэ Буряадай аграрна колледжын дэр­гэдэ волонтёрнууд далдалуулгын гүльмэнүүдые оёдог.

- Залуушуулһаа эхилээд, үндэр наһанайнгаа дабаан дээрэ ябаһан хүндэтэ эжы абанар энэ хэрэгтэ хам оролсоно. Харгы замдаа сагаа һалгаажа байхагүйн тула олон зон гэр гэрээрээ оёно. Тэдэнэртэ һайн дуратан Владимир Викторович Смо­лин хэрэгтэй зүйлнүүдыень гэртэнь абаашажа үгэдэг, - гээд, Очирма Очировна мэдээсэнэ.

Бидэ гэһэн олоороо ...

Телеграмм соо байгуулагдаһан «Бурядай масксети» гэһэн бүлэгтэ 250 гаран хүн бүридхэгдэнхэй. Энэ хадаа үргэн Буряад ороноймнай аймаг бүхэнэй түлөөлэгшэд болоно. Эдэбхитэд хэжэ байһан ажалаа телефон дээрээ буулгаад, бэе бэе­дээ харуулна. Хүдөө нютагуудта ажаһуудаг зон мүн лэ хүбүүдтээ туһалхаяа һанана. Яагаад эхилхэб, ямар аргаар оёхоб гэжэ зарим зон мэдэнэгүй. Тиихэдэ эгээл бэрхэтэй асуудал гэхэдэ, гүльмэнүүдые оёхо бүд ололго. Эдэ мэтын асуудалнууд хамтын бүлэг соо хуу зүбшэн хэл­сэгдэдэг. Дүй дүршэлтэй болоһон волонтёрнууд һая эхилэгшэдтэ заабаряараа туһалдаг.

- Энэ хэрэг ябуулжа байхадаа, бэе бэетэйгээ танилсанабди. Буряад оронойнгоо алишье аймаг ошохо­до, угтаад абаха нүхэдтэй болон­хойнуудбди. Сугтаа сүлөө сагаа һонирхолтойгоор үнгэргэнэбди. Волотёрнуудай дунда ехэ дулаахан оршон тогтонхой, - гээд, Очирма Очировна урматайгаар хөөрэнэ.

Биб гэһэн гансаараа, бидэ гэһэн олоороо гэһэн үгэнүүдэй ёһоор олоной хүсэн хэзээдэшье шанга. Волонтёрнууд һарын туршада 40-50 гүльмэ сэрэгэй газарта эльгээнэ.